नगरकोटीलाई ‘लकस नेपाल वर्ष व्यक्तित्व’ सम्मान

काठमाडौं । लकस नेपालले ‘लकस नेपाल वर्ष व्यक्तित्व २०८० सम्मान’ बाट गोदावरी नगरपालिका वडा ६ लामीडाँडाका गणेशबहादुर नगरकोटीलाई सम्मान गरेको छ । लकसले आफ्नो १३ औँ स्थापना दिवसको अवसर पारेर सो सम्मान प्रदान गरेको हो ।

लकस नेपालको सहजीकरणमा १४ हजार लिटरको पानी शुद्धीकरण ट्याङ्की निर्माण तथा निरन्तर व्यवस्थापनमा सक्रिय रहेका नगरकोटीलाई एक कार्यक्रमका बीच वाग्मती प्रदेशका मन्त्री रामकृष्ण चित्रकारले सम्मान गरेका हुन् । उनको सो कार्यले ८५ घरपरिवारले शुद्ध पानी पिउन पाएका छन् । लामीडाँडा काफलडाँडा खानेपानी तथा सरसफाइ उपभोक्ता समितिका अध्यक्ष नगरकोटीले आफ्नो नेतृत्वमा थप ६० हजार लिटरको पानी ट्याङ्की निर्माण गरी निरन्तर सञ्चालन एवम् व्यवस्थापन गरिरहेका छन् । यस्तै, कार्यक्रममा स्थानीय उत्पादनहरू प्रदर्शनी तथा बिक्री स्टाल समेत राखिएको थियो ।

लकस नेपालको सहजीकरणमा अहिले बागमती गाउँपालिका वडा ३ स्थित भट्टेडाँडाको सातकन्या सामुदायिक कृषक समूहको अगुवाईमा मास्क उत्पादन, जडीबुटी खेती, पशुपालनका लागि घाँस उत्पादन तथा गोदावरी नगरपालिका वडा ४ बडीखेलमा ठूलो खोला आमा समूहको अगुवाईमा मास्क उत्पादन, साबुन उत्पादन, जडीबुटी खेती कार्यक्रम सम्पन्न भएको छ । यस्तै, हालैमात्र ललितपुर महानगरपालिका वडा २२ फर्सीडोल, गोदावरी नगरपालिका वडा ४ मासडाँडा, गोदावरी नगरपालिका –६ लप्सेमा संस्थाको कार्यस्थल विस्तार गरी कार्य योजनाअनुरूप कार्यक्रमहरू आरम्भ गरिएको संस्थाका कार्यबाहक अध्यक्ष सुरजवीर बज्राचार्यले जानकारी दिए ।

लकस नेपालले आउटरिच इन्टरनेसनलसँगको सम्झौतामा कृषिमा बेर्ना उत्पादन, तरकारी खेती, पशुपालन, जडीबुटी खेती, गोलभेँडा टनेल खेती, घाँस उत्पादन, बचत तथा ऋणमार्फत जीवनस्तर उकास्ने, पानी शुद्धीकरण ट्याङ्की निर्माणलगायतका कार्यमा सहकार्य गर्दै आएको छ ।