‘नेपालको विकासमा जापानको ठूलो सहयोग छ’

काठमाडौं । राष्ट्रपति रामचन्द्र पौडेलले जापानले लामो समयदेखि नेपालको विकासमा निरन्तर सहयोग गरिरहेको बताएका छन् । नेपाल जाइका अलमनाई एसोसियसन (जान) का प्रतिनिधिसँगको भेटमा उनले जापानको सहयोग सधैं निःस्वार्थरूपमा रहेको र जापानको सहयोगले नेपालमा आर्थिक तथा सामाजिक परिवर्तन ल्याउन ठूलो सहयोग पुगेको बताए ।

साथै, उनले जापान सरकारको सहयोगको प्रशंसा समेत गरे । जानका अध्यक्ष डा रामचन्द्र भुसालले जानका गतिविधि र नेपाल जापान सम्बन्धलाई सुदृढ बनाउन जानले खेलेको भूमिकाको बारेमा राष्ट्रपतिलाई जानकारी गराएका थिए । जान जापानमा अध्ययन गरी फर्किएका नेपाल सरकारका बहालवाला तथा सेवा निवृत्त सरकारी अधिकारीहरू, विभिन्न सार्वजनिक क्षेत्रका प्राविधिकहरू, प्राज्ञहरू, स्वतन्त्र प्राविधिक तथा व्यावसायिकको सामाजिक संस्था हो ।