दोलखाका स्थानीय तहको ५५ करोड बढी बजेट फ्रिज

दोलखा । जिल्लाका नौवटा स्थानीय तहहरूले संघ र प्रदेश सरकारबाट आएको ५५ करोडभन्दा बढी बजेट खर्च गर्न नसकेर फ्रिज गएको छ । दुई नगरपालिका र सात गाउँपालिका रहेको दोलखाका नौवटा स्थानीय तहका लागि गत आर्थिक वर्ष २०७९/८० मा संघ र प्रदेश सरकारबाट पाँच अर्ब ७३ करोड ५४ लाख ९१ हजार सात सय रुपैयाँ बजेट आएको थियो ।

सोमध्ये ५५ करोड ७८ लाख १७ हजार पाँच सय रुपैयाँ बजेट खर्च हुन नसकेपछि फ्रिज गएको हो । गत आवमा सबैभन्दा बढी बजेट तामाकोशी गाउँपालिकाको फ्रिज भएको छ । पालिकाको संघ र प्रदेश सरकारबाट आएकामध्ये आठ करोड २० लाख ४६ हजार दुई सय ९८ रुपैयाँ बजेट फ्रिज भएको हो । यस्तै, शैलुङ गाउँपालिकाले आठ करोड सात लाख ७६ हजार एक सय रुपैयाँ बजेट फ्रिज पठाएको छ । त्यसैगरी, भीमेश्वर नगरपालिकाको सात करोड ८५ लाख ८४ हजार नौ सय ४३ रुपैयाँ, जिरी नगरपालिकाले तीन करोड ९१ लाख ४० हजार चार सय ७१ रुपैयाँ, कालिञ्चोक गाउँपालिकाले छ करोड ७६ लाख ९२ हजार नौ सय ७८ रुपैयाँ र गौरीशंकर गाउँपालिकाले पाँच करोड ७० लाख ३९ हजार आठ सय ७७ रुपैयाँ बजेट फिर्ता पठाएको कोष तथा लेखा नियन्त्रक कार्यालय दोलखाले जनाएको छ ।

कार्यालयका अनुसार मेलुङ गाउँपालिकाले सात करोड एक लाख ७५ हजार चार सय २० रुपैयाँ, बैतेश्वर गाउँपालिकाले पाँच करोड ४२ लाख ८७ हजार दुई सय १० रुपैयाँ र सबैभन्दा कम विगु गाउँपालिकाले दुई करोड ८० लाख ७४ हजार एक सय २९ रुपैयाँ बजेट खर्च गर्न नसकेपछि फ्रिज गएको छ । स्थानीय सरकारले खर्च गर्न नसकेको बजेट संघ र प्रदेश सरकारकै खातामा फिर्ता गर्नुपर्ने व्यवस्था छ । सोहीअनुसार खर्च हुन नसकेको उक्त रकम फिर्ता गरेको कोष तथा लेखा नियन्त्रक कार्यालय दोलखाले जनाएको छ ।