आगलागीबाट ७५ वर्षीया दुई महिलाको मृत्यु

काठमाडौं । झापा र भोजपुरमा गरी दुई महिलाको आगलागीबाट मृत्यु भएको छ । ७५ वर्षीया दुई महिलाको घरमा आगलागी हुँदा र खाना पकाउने क्रममा मृत्यु भएको हो ।

झापास्थित अर्जुनधारा नगरपालिका–१० बस्ने ७५ वर्षीया दिलकुमारी राईको घरमा बिहीबार राति आगलागी हुँदा आगोले जलेर घटनास्थलमै मृत्यु भएको हो । आगलागीमा परी उनका पति ७३ वर्षीय शिव कुमार राई घाइते भएका छन् । उनलाई बीएण्डसी अस्पताल बिर्तामोड हुँदै थप उपचारको लागि शनिश्चरे अस्पताल पठाइएको छ । साथै आगलागीबाट घर पूर्णरुपमा जलेर करिब ७५ हजार रूपैयाँ बराबरको धनमाल नष्ट भएको छ ।

त्यस्तै, भोजपुरस्थित आमचोक गाउँपालिका–६ राधुन बस्ने ७५ वर्षीया लालमाया राईको आगोमा जलेर शुक्रबार राति मृत्यु भएको छ । आफ्नै घरमा तरकारी पकाउने क्रममा आगोमा जलेर उनको मृत्यु भएको हो । आगलागी नियन्त्रणमा लिनुको साथै यस सम्बन्धमा प्रहरीले आवश्यक अनुसन्धान गरिरहेको जनाएको छ ।