टेलिकमको आम्दानीमा गिरावट

काठमाडौं । नेपाल टेलिकमको आम्दानीमा गिरावट आएको छ । कम्पनीले हालै सार्वजनिक गरेको आर्थिक वर्ष २०८०/८१ को पहिलो तीन महिनाको वित्तीय विवरणअनुसार ३९ करोड रुपैयाँभन्दा बढी आम्दानी घटेको हो ।

टेलिकमको चालू आवको प्रथम त्रैमासिक अवधि (२०८० असोज मसान्त)सम्मको कुल आय १० अर्ब ६४ करोड ८७ लाख ९३ हजार रुपैयाँ रहेको छ । उक्त रकम गत आवको सोही अवधिको कुल आयको तुलनामा तीन दशमलव ५४ प्रतिशतले कमी भएको हो ।

गत आवमा ११ अर्ब चार करोड ९० हजार रुपैयाँ आम्दानी भएको थियो । उक्त आम्दानीको तुलनामा चालू आवमा ३९ करोड १२ लाख ९७ हजार रुपैयाँ कम हो । यस्तै, कम्पनीको कुल सञ्चालन आय पनि ४९ करोड २५ लाख २१ हजार रुपैयाँ घटेको छ । चालू आवको प्रथम त्रैमासिक अवधिसम्मको कुल सञ्चालन आय आठ अर्ब ५८ करोड ५० लाख ६३ हजार रुपैयाँ रहेको छ । उक्त रकम गत आवको सोही अवधिको कुल सञ्चालन आय नौ अर्ब सात करोड ७५ लाख ८४ हजार रुपैयाँ रहेको थियो । कम्पनीको कुल सञ्चालन आय ४९ करोड २५ लाख २१ हजार (अर्थात् पाँच दशमलव ४३ प्रतिशत) ले कमी भएको टेलिकमले जनाएको छ ।

यसैगरी, कम्पनीको खुद मुनाफा पनि कमी आएको छ । कम्पनीको खुद मुनाफा प्रथम तीन महिनामा दुई अर्ब दुई करोड ७४ लाख ३२ हजार रुपैयाँ रहेको छ । उक्त रकम गत आवको सोही अवधिमा दुई अर्ब २२ करोड ५५ लाख छ हजार रहेको थियो । गत आवको तुलनामा चालू आवमा १९ करोड ८० लाख ७४ हजार (अर्थात् ८.९० प्रतिशत) ले कमी भएको कम्पनीले जनाएको छ । यस्तै, कम्पनीको प्रतिसेयर आम्दानी यस त्रैमासिक अवधिमा ४५ दशमलव शून्य पाँच रुपैयाँ रहेको छ । चालू आवमा राजस्व तथा खुद मुनाफामा परिवर्तन हुनुका प्रमुख कारणमा ओटीटी सेवाको बढ्दो प्रयोग रहेको जनाइएको छ ।

राष्ट्रको सञ्चार भएकाले बढी लागत तथा कम प्रतिफल प्राप्त हुने विकट तथा दुर्गम स्थानमा समेत सेवा विस्तार र गुणस्तर सुधारको कार्यमा निरन्तर लागिरहेको र लागतसमेत बढिरहेको कम्पनीले जनाएको छ । सेवाको दररेट निर्धारणसम्बन्धी नीति तथा नियमहरू परिवर्तन भएका कारणले सेवाको दररेटमा कटौती भई राजस्वमा प्रतिकुल असर पर्नुका साथै बैंक ब्याजदरमा भएको परिवर्तनका कारण वित्तीय आम्दानी करिब कमी भएको कम्पनीद्वारा जारी विज्ञप्तिमा उल्लेख छ ।