यसवर्षको सेजन अवार्ड कान्तिपुरका दाहाल र भट्टराईलाई

काठमाडौं । यस वर्षको सेजन(नेपाल आर्थिक पत्रकार समाज) अवार्ड कान्तिपुर दैनिकका मातृका दाहाल र देवेन्द्र भट्टराईलाई संयुक्तरूपमा प्रदान गरिएको छ । निर्णायक समितिका सदस्य पूर्वसचिव कृष्ण ज्ञवालीका अनुसार कान्तिपुर दैनिकमा प्रकाशित नक्कली भुटानी शरणार्थी प्रकरणबारेको समाचार लेखनका लागि दाहाल र भट्टराईलाई सेजन अवार्ड प्रदान गरिएको हो ।

सेजनले हरेक वर्ष आर्थिक विधाका उत्कृष्ट समाचारलाई उक्त अवार्ड प्रदान गर्दै आएको छ । त्यस्तै, भोला चालिसे लिबरल जर्नालिजम अवार्ड हिमाल खबरका रमेश कुमार न्यौपानेलाई दिइएको छ ।

सेजन ब्रोडकास्ट अवार्ड उज्यालो रेडियोका अर्जुन पोखरेल, सेजन डिजिटल मिडिया अवार्ड क्लिकमाण्डुका राजेश बर्मा र सेजन छापा माध्याम अवार्ड नयाँ पत्रिका दैनिकका मुना कुँवरलाई प्रदान गरिएको छ । स्व सञ्जय न्यौपाने रिसर्च ग्रान्ट कान्तिपुर दैनिकका यज्ञ बञ्जाडेलाई उपलब्ध गराइएको छ । सेजन डेका अवसरमा वार्षिक प्रकाशन ‘अर्थनीति’ पनि विमोचन भएको छ ।