त्रिभुवन अन्तर्राष्ट्रिय विमानस्थलबाट १४ केजी सुनसहित गोरखाका घले पक्राउ

काठमाडौं । त्रिभुवन अन्तर्राष्ट्रिय विमानस्थलबाट १४ किलो सुनसहित गोरखाका चन्द्र बहादुर घले पक्राउ परेका छन् । फ्लाई दुबईको उडानमार्फत् बिहीबार राति काठमाडौं उत्रिएका उनलाई भन्सारको टोलीले पक्राउ गरेको हो ।

उनको साथबाट दुई केजीका दरले सात वटा विस्कुट बरामद भएको थियो । उनले सर्टभित्र लगाएको स्टकोर्टमा उक्त सुन लुकाएर ल्याएका थिए । चन्द्र डेढ हप्ता अघि मात्र दुबई गएका थिए । एक वर्षमा तीन पटक दुबई गएको प्रहरी स्रोतले बताएको छ ।

घले ठूलो परिमाणमा सुनसहित नेपाल आउन लागेको भन्ने पूर्व सूचनाका आधारमा भन्सारले निगरानी बढाएको थियो । घले बुधबार नै काठमाडौं आउने भन्ने सूचनाका आधारमा निगरानी गरिएको थियो । तर उनी बुधबार आएनन् । बिहीबारसम्म निगरानी जारी राखिएको अवस्थामा भन्सार कार्यालयले उनलाई नियन्त्रणमा लिएको हो ।

घले पक्राउ परेपछि उनको कल डिटेल लगायतको परीक्षणपछि बिहीबार राति नै थप एक जनालाई पक्राउ गरिएको छ । पक्राउ पर्ने अर्का व्यक्ति गोरखा नै घर भएका मिनबहादुर घले रहेका छन् । काठमाडौंको धुम्बाराही बस्दै आएका मिनबहादुरलाई प्रहरीले बिहीबार राति नै पक्राउ गरेको हो ।