मन्त्री साउदद्वारा कतारका प्रधानमन्त्रीसँग विपिनको रिहाईको पहल गरिदिन माग

काठमाडौं । कतारका प्रधानमन्त्री शेख मोहम्मद बिन अब्दुल रहमान अल–थानीसँग हिजो(सोमबार) गरेको शिष्टाचार भेटवार्तामा परराष्ट्रमन्त्री एनपी साउदले हमासद्वारा बन्दी बनाइएका विपिन जोशीको शीघ्र रिहाइका लागि थप सशक्त पहल गरिदिन विशेष अनुरोध गरेका छन् । मन्त्री साउदको सचिवालयका अनुसार कतारको राजधानी दोहामा उनीहरुबीच भएको भेटवार्तामा उक्त अनुरोध गरिएको हो ।

साउदले हमासद्वारा बन्दी बनाइएका नेपाली विद्यार्थी जोशीको रिहाइका लागि थप सशक्त पहल गरिदिन विशेष अनुरोध गरेको मन्त्रीका स्वकीय सचिव दीपक जोशीले जानकारी गराएका छन् । साथै, परराष्ट्रमन्त्री साउदले हमाससँग कतारको सम्पर्क, मध्यपूर्वको समस्यामा कतारले निर्वाह गरिरहेको सक्रिय मध्यस्थकर्ताको भूमिका एवम् कतार र नेपालबीचको जनस्तरलगायतको गहिरो र मित्रवत् सम्बन्धका आधारमा यस मानवीय मामिलामा कतार अधिराज्यसँग नेपाल सरकारले उच्च आशा गरेको बताए ।

जवाफमा कतारका प्रधानमन्त्री अल थानीले विपिन जोशीलगायत विदेशी बन्दीहरुको रिहाइका लागि कतार सरकारले उच्च प्रयास गरिरहेको बताएका छन् । उनले चाँडै सकारात्मक परिणाम आउनसक्ने सङ्केतसमेत गरेका छन् । उनले नेपालसँगको सम्बन्धलाई कतार सरकारले प्राथमिकतामा राखेको बताएका छन् ।

परराष्ट्रमन्त्री साउदले कतारका प्रधानमन्त्री अल थानीसँग व्यापार र लगानीका विषय, कतार फ्रन्ट फर डेभलपमेन्टबाट हुने विकास सहयोग, आगामी उच्चस्तरीय भ्रमण आदि विषयमा समेत कुराकानी गरे । परराष्ट्रमन्त्री साउद दोहामा जारी विभिन्न मुलुकका राष्ट्रप्रमुख, सरकार प्रमुख, विदेशमन्त्री, निजी क्षेत्र, विषय विज्ञ, सञ्चारकर्मी सम्मिलित दोहा फोरम २०२३ मा प्यानलिस्टका रुपमा समेत सहभागी भएका हुन् ।