दोहोरी साँझमा आगलागी, लाखौं रुपैयाको क्षति

पोखरा । पोखराको सृजनाचोकस्थित एक दोहोरी साँझमा आगलागी हुँदा लाखौं रुपैया बराबरको क्षति भएको छ । पोखरा महानगरपालिका वडा नं.८ सिर्जनाचोकस्थित नैना दोहोरी साँझमा विद्युत सर्ट भई बुधबार बिहान आगलागी हुँदा सो क्षति भएको हो ।

आगलागीबाट ५० हजार रुपैयाँ नगद, एसीहरु, कम्प्युटर, सीसी क्यामेरा, साउण्ड सिस्टम, फ्रिज, ग्यास गिजर, टिभि, सोफालगायतका सामानहरू जलेर नष्ट भएका छन् । भवनको तेश्रो तल्लामा रहेको दोहोरी साँझमा आगलागी भएपनि भवनमै रहेका अन्य कार्यालय तथा पसलहरु भने सुरक्षित रहेका छन् ।

विद्युत सर्ट भएर लागेको आगो स्थानीयवासी, दमकल र प्रहरीको सहयोगमा नियन्त्रणमा लिइएको थियो । आगो नियन्त्रणका लागि वडा प्रहरी कार्यालय बैदामबाट प्रहरी निरीक्षक नेत्रबहादुर कुंँवरको कमाण्डमा १५ जना प्रहरी खटिएका थिए ।