चार करोडबढीको भ्रष्टाचार मुद्दाको फैसलाविरुद्ध अख्तियारद्वारा सर्वोच्चमा पुनरावेदन

काठमाडौं । विशेष अदालतबाट भएको एक मुद्दाको फैसलाउपर अख्तियार दुरुपयोग अनुसन्धान आयोगले सर्वोच्च अदालतमा पुनरावेदन गरेको छ । आयोगले चार करोड २० लाखभन्दा बढी गैरकानुनी सम्पत्ति आर्जन गरी भ्रष्टाचार गरेकोसम्बन्धी मुद्दा सर्वोच्चमा पुनरावेदन गरेको हो ।

विशेष अदालत काठमाडौंमा दायर मुद्दाको फैसलाउपर आयोगलाई चित्त नबुझेपछि यही पुस ८ गते सर्वोच्चमा पुनरावेदन गरेको हो । विशेष अदालतबाट विभिन्न मितिमा फैसला भएकामध्ये गैरकानुनी सम्पत्ति आर्जन गरी भ्रष्टाचार गरेकोसम्बन्धी मुद्दामा अख्तियारको निर्णय अनुसार आइतबार सर्वोच्चमा पुनरावेदन गरिएको अख्तियारका प्रवक्ता नरहरि घिमिरेले प्रेस विज्ञप्तिमार्फत जानकारी गराए ।

चुडामणि शर्माले सार्वजनिक सेवा अवधिमा तीन करोड ६३ लाख ७२ हजार नौ सय ६१ रुपैयाँ आयआर्जन गरेको देखिएको अख्तियारले जनाएको छ । प्रवक्ता घिमिरेका अनुसार सो रकमको तुलनामा विभिन्न शीर्षकमा गरिएको खर्च तथा लगानी सात करोड ९३ लाख २७ हजार ८५ रुपैयाँ देखिएको छ ।

शर्माको आयभन्दा बढी खर्च तथा लगानी गरेको चार करोड २९ लाख ५४ हजार एक सय २४ रुपैयाँ देखिएको छ । उक्त सम्पत्ति गैरकानुनी रुपमा आर्जन गरी अमिल्दो तथा अस्वभाविक उच्च जीवनयापन गरेको देखिँदा शर्माले भ्रष्टाचार निवारण ऐन बमोजिमको कसूर गरेको पुष्टि भएको अख्तियारको ठहर छ ।

शर्माले सार्वजनिक सेवाको पदमा रही आफ्नो पदको दुरुपयोग गरी भ्रष्टाचारजन्य कार्य गरी गैरकानुनी रुपमा आर्जन गरेको स्रोत नखुल्ने सम्पत्ति श्रीमती कल्पना उप्रेती शर्मासमेतको नाममा राखेको देखिएको छ । उक्त स्रोत नखुलेको सम्पत्ति जफत गर्ने प्रयोजनार्थ मात्र साविक भ्रष्टाचार निवारण बमोजिम प्रतिवादी शर्माको श्रीमती कल्पनालाई प्रतिवादी कायम गरी उक्त सम्पत्ति जफत हुन मागदाबी लिइएको अख्तियारले जनाएको छ ।