पर्वतमा एक युवकको हत्या, अर्का युवकको उपचार हुँदै

पोखरा । पर्वतमा एक युवकको हत्या भएको छ । जिल्ला प्रहरी कार्यालयका अनुसार मोदी गाउँपालिका वडा नं.२ देउपुरका ४० वर्षीय उदय रिजालको आइतबार हत्या भएको हो ।

प्रहरीका अनुसार रिजालसँगै सोही ठाउँका ३५ वर्षीय प्रेमबहादुर नेपाली र ४० वर्षीय श्रीराम शर्मा आइतबार दिउँसो स्थानीय सामुदायिक वनमा तरुल खोज्न गएका थिए । तरुल खन्न प्रयोग गरिएको हतियारले नेपालीले रिजाललाई घाइते बनाएको जिल्ला प्रहरी कार्यालयका प्रहरी निरीक्षक अविनाश दीप जिसीले जानकारी दिए ।

अचेत अवस्थामा जङ्गलमा फेला परेका रिजाललाई पर्वत अस्पतालमा उपचारका लागि ल्याउँदा चिकित्सकले मृत घोषणा गरेकोे उनले बताए । घटनामा घाइते भएका शर्माको पोखरास्थित मणिपाल शिक्षण अस्पतालमा उपचार भइरहेको प्रहरी निरीक्षक जिसीले जानकारी दिए ।

घटनामा संलग्न भएको आरोपमा प्रहरीले नेपालीलाई नियन्त्रणमा लिएको छ । नेपालीले पुरानो रिसिबीका कारण रिजालको हत्या गरेको बयान दिएका छन् । घटनाको थप अनुसन्धान भइरहेको प्रहरीले जनाएको छ ।