निलम्बन डा.विशदलाई काममा फर्काउन माग गर्दै केएमसी अस्पतालमा आन्दोलन

काठमाडौं । निलम्बित डाक्टर विशद दाहाललाई निलम्बन फुकुवा गरी पुन:काममा फर्काउन माग गर्दै सिनामंगलस्थित केएमसी हस्पिटलमा आन्दोलन सुरु गरिएको छ । आज(बुधबार) बिहानदेखि आवासीय चिकित्सकहरुको समुहले हस्पिटल गेट अगाडि भेला भई विशद दाहाललाई हस्पिटल प्रवेशमा रोक लगाउन पाईदैन भन्दै नारावाजी गरेका हुन् ।

काठमाडौं विश्वविद्यालय कार्यालयले निर्देशन गरेको तर केएमसी प्रशासनले नमानेको भन्दै एमडी तेस्रो बर्षमा अध्ययनरत डा.विजय केसिको नेतृत्वमा निज निलम्बित डा.दाहाललगायत करिब ३० जनाको समुहले नाराबाजी गरेका हुन् ।

केएमसी हस्पिटलमा एमडी दोस्रो वर्षमा अध्ययनरत आवासीय विद्यार्थी विशद दाहाललाई हस्पिटलले संचालन गरेको स्वास्थ्य शिविरहरुमा जान नमानेको भन्दै यहि पुस १२ गतेदेखि एक महिनाका लागि निलम्बन गरेको थियो । सोही निलम्बनविरुद्ध केएमसी हस्पिटलमा अध्ययनरत आवासीय विद्यार्थीहरुले आज बिहान करिब साढे ९ बजेबाट शान्तिपूर्ण भेला भई विरोध जनाइरहेका छन् ।