‘मातेका’ यात्रुले कर्मचारीलाई टोकिदिएपछि अमेरिका उडेको विमान जापान फिर्ता
काठमाडौं,जापानबाट संयुक्त राज्य अमेरिकाका लागि उडेको एउटा जापानी विमानमा मदिरा पिएर मातेका एक यात्रुले चालकदलकी एक सदस्यलाई टोकिदिएपछि उक्त विमान टोक्यो फर्किएको छ।
ती ५५ वर्षे अमेरिकी यात्रुले मदिरा पिएर “निकै मातेको” अवस्थामा एक महिला अटेन्डन्टको पाखुरामा टोकिदिएको एएनए विमानसेवाका प्रवक्ताले समाचारसंस्था एएफपीलाई बताए। विमानकी ती कर्मचारीको पाखुरामा चोट लागेको छ।
जापानी सञ्चारमाध्यमका अनुसार ती व्यक्तिले प्रहरीलाई आफूले निद्रा लाग्ने औषधि खाएको र के भयो भन्नेबारे आफूलाई सम्झना नभएको बयान दिएका छन्।
यो महिना यसअघि पनि जापानी विमानमा केही अप्रिय घटनाहरू भएका थिए।
अहिलेको घटना हुँदा १५९ यात्रुसहित उडिरहेको विमान प्रशान्त महासागरमाथि थियो।
चालकदलका सदस्यमाथि शारीरिक आक्रमण भएपछि विमानचालकले विमान टोक्योस्थित हानेदा विमानस्थलतिर फर्काएका थिए।
एएनए विमानसेवाका अनुसार कर्मचारीलाई टोक्ने यात्रुलाई टोक्योस्थित विमानस्थलमा प्रहरीको जिम्मा लगाइएको थियो।
जापानी विमानमा भएका घटनाहरूको शृङ्खला
केही दिनअघि एनएनएको अर्को उडान पनि प्रभावित भएको थियो भने केही साताको अवधिमा जापानी विमानमा अस्वाभाविक घटना भएको पाँचौँ पटक हो।
गत शनिवार आन्तरिक उडानमा रहेको एनएनएको एउटा विमानको ककपिटको झ्याल चर्किएको पत्ता लागेपछि आकाशबाटै फर्काइएको थियो।
उक्त विमानमा विमानचालक बस्ने भागमा भएको झ्यालका सिसाका चार पत्रमध्ये बाह्य पत्र चर्किएको भए पनि सबै जना सकुशल थिए।
“सिसा चर्किएको भए पनि त्यसबाट विमान नियन्त्रण [प्रणाली] वा चाप कायम राख्ने काममा कुनै प्रभाव परेको थिएन,” एनएनएका प्रवक्ताले बताए।
त्यसअघि ज्यानुअरी २ मा हानेदा विमानस्थलमा एउटा डरलाग्दो दुर्घटना भएको थियो।
तीन सय ७९ जना सवार जापान एअरलाइन्सको विमान जापानी तटरक्षक निकायको एउटा सानो विमानसँग ठोक्किएको थियो।
उक्त दुर्घटनामा यात्रुवाहक विमानमा ठूलो आगलागी भएको थियो भने सानो विमानमा सवार छ जनामध्ये पाँच जनाको मृत्यु भएको थियो। यात्रुवाहक विमानका सबै जनालाई सकुशल उद्धार गरिएको थियो।
जापानी तटरक्षक निकायको उक्त विमान मध्यजापानमा भूकम्प गएपछि राहत सामग्री आपूर्ति गर्न प्रयोग गरिएको थियो।
अनि उत्तरी जापानको होक्काइदो टापुमा मङ्गलवार कोरियन एअर र क्याथे प्यासिफिकका विमानहरूका पखेटा भाँचिएका थिए।
हिउँदे मौसमका कारण भएको ठानिएको उक्त दुर्घटनामा कोही पनि घाइते भने भएका थिएनन्।
संयुक्त राज्य अमेरिकाको शिकागो विमानस्थलमा आइतवार एएनएको एउटा विमानको पखेटा डेल्टा एअरलाइन्सको अर्को विमानको पखेटासँग ठोकिएको एनएनएका प्रवक्ताले एएफपीलाई बताए।
उक्त घटनामा कोही पनि घाइते भएनन्। (बीबीसी)
क्याटेगोरी : समाचार
ताजा अपडेट
- इजरेल किन अधीनस्थ वेस्ट ब्याङ्कमा बस्ती बसाउने काम रोक्दैन ?
- दुर्घटना अपडेटः बसको ठक्करबाट घाइते महिलाको पनि मृत्यु
- उदाउँदो चन्द्रमालाई अघ्र्य दिँदै चौठचन्द्र पर्व सम्पन्न
- राजनीतिक परिवर्तनप्रति कर्मचारीहरुले गरेको योगदान प्रशंसायोग्य छ :प्रधानमन्त्री
- हरितालिका (तीज) : पशुपतिनाथलगायत देशभरका शिवालयमा बिहानैदेखि भीड
- संयुक्त राष्ट्रसङ्घको महासभामा भाग लिन प्रधानमन्त्री ओली न्यूयोर्क जानुहुने
- जेष्ठ नागरिकको अवस्था
- नेपालको वैदेशिक व्यापारमा चुनौतीहरू
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- ढोरपाटन जोड्ने सडक कालोपत्रे गरिँदै
- चिया पसल पनि कम्पनी ?
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया