अत्तरखेलस्थित मेडिकल कलेजमा अध्ययनरत विद्यार्थीद्वारा धर्ना जारी

काठमाडौं । गोकर्णेश्वर नगरपालिका–८ नेपाल मेडिकल कलेज अत्तरखेलमा एमबीबीएस पहिलो र दोस्रो बर्षमा अध्ययनरत विद्यार्थीहरुले आज(शुक्रबार) पनि धर्ना जारी राखेका छन् । अस्पतालको क्यान्टिनले खानामा चरम लापर्बाही गरेको बिषयलाई लिएर धर्ना थालेका उनीहरुले त्यसको कुनैपनि सुनुवाई नभएकाले धर्नाको ९औँ दिन आज पनि धर्ना जारी राखेका हुन् ।

करिब ७० जनाको संख्यामा रहेका उनीहरुले प्रशासनलाई मासुभात विद्यार्थीहरुलाई झिगा भात, क्यान्टिनमा कार्ड सिस्टम लागू गर, तरकारीमा घिरौला कति भाग्छस हेरौला, दादागिरि चल्दैनलगायतका नारासहित शान्तिपूर्ण धर्ना गरेका छन् । सोही कलेजमा अध्ययनरत विद्यार्थी रोशन श्रेष्ठको नेतृत्वमा अस्पतालको ओपीडी अगाडी बसेको शान्तिपूर्ण धर्नाले अस्पताललाई भने कुनैपनि असर नपरेकाले अस्पताल पूर्णरुपमा संचालनमा रहेको छ ।