दाङमा बस दुर्घटना, दुईको मृत्यु

दाङ । बर्दियाबाट काठमाडौं जाँदै गरेको प्रदेश ३०१००५ ख ९७१९ नम्बरको बस दाङ लमही नगरपालिका–९ रिहार नजिकै गएराति दुर्घटना हुँदा बसमा सवार दुई जनाको घटनास्थलमै मृत्यु भएको छ । बर्दिया गेरुवा गाउँपालिका–१ निवासी ३६ वर्षीय भीमनाथ योगी र युवराज चौधरीको मृत्यु भएको हो ।

इलाका प्रहरी कार्यालय अमिलियाका प्रहरी निरीक्षक लालबहादुर श्रेष्ठका अनुसार बसमा ४७ जना सवार रहेकोमा दुई जना घाइते भएको र अन्य यात्रु सकुशल रहेका छन् । राससले जनाएनुसार शवलाई लमही अस्पतालमा राखिएको छ ।

बसको पट्टा भाँचिएर दुर्घटना भएको प्रहरीले जनाएको छ । अगाडि बसेका व्यक्ति हुत्तिएर च्यापिन पुगेकाले दुई जनाको मृत्यु भएको हुनसक्ने प्रहरीले जनाएको छ ।