नेपालीलाई रुसी सेनामा भर्ती गर्न र युद्धमा प्रयोग गर्ने कार्य तत्काल रोक्न माग

काठमाडौं । बालुवाटारस्थित रुसी दूतावासलाई लक्षित गरि नेपालीहरुलाई रुसी सेनामा भर्ती गर्ने र युद्धमा प्रयोग गर्ने कार्य तत्काल रोक्न रुसलाई आग्रह गर्दै प्रदर्शन गरिएको छ । सोमबार दिउँसो बालुवाटारस्थित पवित्र वर्कशप चोक मुख्य सडक किनारमा मानव अधिकार तथा शान्ति समाजको आयोजनामा उक्त माग राख्दै प्रदर्शन गरिएको थियो ।

नेपालीहरुलाई रुसी सेनामा भर्ती गर्ने र युद्धमा प्रयोग गर्ने कार्य तत्काल रोक्न रुसलाई आग्रह गर्दै शान्ति समाज काठमाडौं शाखाका जिल्ला सभापति भगवान पुडासैनी, केन्द्रिय सभापति राम कृष्ण बराल, संस्थापक सभापति कृष्ण पाहाडी, केन्द्रिय सदस्य दिवाकर पुडासैनिलगायत करिब ३० जनाको समुहले शान्ति पूर्ण विरोध कार्यक्रम गरेका थिए । कार्यक्रममा उनीहरुले रसियाः युक्रेनमा बन्द गर युद्ध, रुसः क्षति अति भयो, युद्ध तत्काल बन्द गर, मित्रताले मानवता बचाउछ, ७१२ दिनको युद्धले केही पाइएन, गुमाए धेरै कुराहरु लगायतका विरोधका विभिन्न प्लेकार्डसहित प्रदर्शन गरेका थिए ।