साइमेक्स इंक लगायत सम्पूर्ण आयातकर्ता कम्पनीमाथि छानबिन
अर्बौँ राजस्व छली भएको प्रारम्भिक अनुमान
आर्थिक दैनिक २०८१, असार १८ ०८:२४ 
राजस्व अनुसन्धान विभागले ईभी गाडी आयात गर्ने साइमेक्स इंकलगायत अन्य सम्पूर्ण आयातकर्ता कम्पनीमाथि एकैसाथ अनुसन्धान थालेको छ । साइमेक्स इंकलगायतका कम्पनीहरूले अर्बाैँ रुपैयाँ राजस्व छलेको हुनसक्ने प्रारम्भिक अनुमान गर्दै राजस्व अनुसन्धान विभागले ईभी आयात गर्ने साइमेक्स इंकलाई केन्द्रमा राखेर अन्य आयातकर्ता कम्पनीमाथि समेत सशक्त अनुसन्धान थालिएको जनाएको छ ।चिनियाँ ईभी गाडी बीवाईडीको आयातकर्ता कम्पनी साइमेक्स इंकको ठगी धन्दा मौलाउन पुगेको भन्दै राजस्व अनुसन्धान विभागले साइमेक्स कम्पनीका सबै कागजपत्रहरू नियन्त्रणमा लिएर छानबिन गरिरहेको छ ।बीवाईडीको नेपालस्थित बिक्रेता साइमेक्स इंकले बढी किलोवाटको ईभी गाडीलाई कम किलोवाट देखाएर राजस्व छली गरेको विषयलाई गम्भीरतापूर्वक छानबिन गरिएको विभागका अनुसन्धान अधिकृतहरूको भनाइ छ ।
हाल नेपालको जम्मा गाडी बिक्रीमा ईभी गाडीको बिक्री ७० प्रतिशत छ । ईभी गाडीले बजार लिँदै गए पनि ईभी गाडीको आयात गर्नेहरूले राजस्व छली गर्ने उद्देश्यले विभिन्न खाले परिपञ्चहरू अपनाउँदै आइरहेको बताइएको छ । जसका कारण राज्यकोषमा आउनुपर्ने अर्बाँै रुपैयाँ राजस्व गुमिरहेको छ । राजस्व अनुसन्धान विभागले समेत प्रारम्भिक छानबिनमा ईभी गाडी आयात गर्ने साइमेक्स इंकलगायतका कम्पनीले अर्बाँै रुपैयाँ राजस्व छली गरेको निष्कर्ष निकाल्दै छानबिनलाई मिहिन ढङ्गले अगाडि बढाउनुपर्ने आवश्यकता औँल्याएको छ । राजस्व अनुसन्धान विभागका महानिर्देशक चक्रबहादुर बुढाले ईभी गाडी आयात गर्ने साइमेक्स इंकलगायत सम्पूर्ण आयातकर्ता कम्पनीमाथि एकैसाथ अनुसन्धान थालिएको जानकारी दिए । ‘राजस्व छली गर्नेहरूमाथि विभाग कठोररूपमा अघि बढ्छ, जोसुकै भए पनि राजस्व छली गर्नेहरूलाई कानुनी दायरामा ल्याउन दृढ छौँ । यस प्रकरणमा पनि प्रभावकारीरूपमा छानबिन सम्पन्न गर्छाैँ’, महानिर्देशक बुढाले भने ।
राजस्व अनुसन्धान विभागले भन्सार विभागलाई पत्र लेख्दै साइमेक्स इंकले विगत पाँच वर्षमा नेपालमा आयात गरेका ईभी गाडीको आयात विवरण उपलब्ध गराउन भनेको छ । साथै राजस्व अनुसन्धान विभागले त्यसरी नेपाल ल्याइएका सबै ईभी गाडीको क्षमता के–कति छ ? त्यसको विवरण, ती कम्पनीले गरेका गाडीको मूल्य घोषणाको विवरण, उनीहरूले भन्सार तिरेको विवरणलगायतका कागजपत्र समेत माग गरेको छ । यसैगरी राजस्व अनुसन्धान विभागले गत पाँच वर्षमा नेपालमा भित्रिएका सबै ईभी गाडीको विस्तृत विवरण समेत भन्सार विभागसँग माग गरेको छ । मुख्य छानबिनको घेरामा रहेको साइमेक्स इंकको मुख्य सञ्चालकको रूपमा यमुना श्रेष्ठ र समिर श्रेष्ठ छन् ।
साइमेक्स इंक बाहेक ईभी गाडी आयात गर्ने अन्य सबै कम्पनीको विस्तृत विवरण, मोटर क्षमता समेत माग गरिएको राजस्व अनुसन्धान विभागले जनाएको छ । साइमेक्स इंकलगायतका आयातकर्ताले एक सय ५० किलोवाट क्षमताका गाडीलाई एक सय किलोवाट मात्रै देखाएर राजस्व छली गर्नेगरेको स्रोतको दाबी छ । नेपालमा ईभी गाडीको क्षमता मापन गर्ने मेसिन नहुँदा ती गाडीको वास्तविक क्षमता पहिचान गर्न कठिन हुने देखिन्छ । सो मेसिनको अभावमा गाडीको क्षमता मापन गर्न नसकिने भएकाले राजस्व छली गर्ने क्रम बढेको स्रोतको दावी छ । निर्माता कम्पनीको वेबसाइट तथा अन्तर्राष्ट्रिय बजारमा एउटा क्षमता हुने तर त्यही गाडी नेपाल भित्रिँदा फरक क्षमता देखिनुले आशंका जन्माएको यातायात व्यवस्था कार्यालयका प्राविधिकहरूकै भनाइ छ । बीवाईडीले किलोवाट घटाएर नेपालमा यस वर्ष करिब तीन हजार गाडी बिक्री गरेको हुनसक्ने अनुमान राजस्व अनुसन्धान विभागले गरेको छ ।
क्याटेगोरी : समाचार
ट्याग : #Page 1
ताजा अपडेट
- (रास्वपा)का मन्त्रीहरुले सामुहिक राजीनामा बुझाउदै
- रक्षासचिव र अर्थका उपसचिवमाथि अमेरिका र यूकेको पीआर भएको भन्दै छानबिन
- राष्ट्रिय सूचना प्रविधि केन्द्र खारेजसँगै ४९ जनाको रोजगारी गुम्ने
- रिलायन्स स्पिनिङको आईपीओमा बदनियत देखिएको भन्दै निष्काशन
- अल्पमतमा प्रचण्ड सरकार
- रास्वपा महामन्त्री एवं प्रवक्ता डा ढकाल निलम्बित
- एमालेले समर्थन फिर्ता लिएपछि सरकार अल्पमतमा, अबको प्रक्रिया के
- नौबिसे नागढुङ्गा सडक आज र भोलि राति बन्द हुने
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- ढोरपाटन जोड्ने सडक कालोपत्रे गरिँदै
- राजेन्द्र विमल र हरिहर शर्मालाई पुरस्कृत गरिने
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- चिया पसल पनि कम्पनी ?
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया