प्रवीण राउत
काठमाडौं, साउन २८
उद्योग, वाणिज्य तथा आपूर्ति मन्त्रालयका अनुसार नेपालको उद्योग क्षेत्रमा ९० भन्दा बढी मुलुकले लगानी गरेको पाइन्छ । उद्योगमा प्रत्यक्ष वैदेशिक लगानी (एफडीआई) भित्र्याउनको लागि सरकारले उपयुक्त वातावरण बनाउन नसकेको अवस्थामा समेत ती मुलुकमार्फत सीमित लगानी भने आएको देखिन्छ । यसैबीच, १६ मुलुलकका विदेशी लगानीकर्ताहरुले नेपालको उद्योग क्षेत्रबाट १२ अर्ब ९० करोड ३० लाख रुपैयाँ लाभांश लैजान सफल भएका छन् । नेपाल राष्ट्र बैंकका प्रवक्ता डा. गुणाकर भट्टले गत आर्थिक वर्षको असार मसान्तसम्मको अवधिमा २०७६/०७७ मा विदेशी लगानीकर्ताहरुले लाभांशबापत नेपालको उद्योग क्षेत्रबाट सो रकम लगेको बताए ।
बैंकका अनुसार नेपालको उद्योग क्षेत्रमा लगानी गरी सबैभन्दा धेरै लाभांश लैजानेमा भारतीय उद्योगी तथा व्यवसायीहरु रहेका छन् भने त्यसपछि क्रमश आइरल्याण्ड, अष्ट्रेलिया, बेलायत, पाकिस्तान, मौरिसस, सिंगापुर, बंगलादेशलगायतका उद्योगी तथा व्यवसायीहरु रहेका छन् । भारतीय उद्यागी तथा व्यवसायीले सो समयमा नेपालको उद्योग क्षेत्रबाट आठ अर्ब १४ करोड ७७ लाख, आइरल्याण्डले एक अर्ब ७२ करोड ३० लाख २३ हजार अष्ट्रेलियाका लगानीकर्ताले ८५ करोड दुई लाख, बेलायती लगानीकर्ताले ५८ करोड ८० लाख ७७ हजार, पाकिस्तानका लगानीकर्ताले ३४ करोड ८० लाख ३२ हजार र मौरिससका लगानीकर्ताले ३४ करोड ७५ लाख ८२ हजार लाभांश लगेका छन् ।
त्यसैगरी सोही अवधिमा सिंगापुरका उद्योगी तथा व्यवसायीहरुले २९ करोड ६८ लाख, बंगलादेशका लगानीकर्ताले २१ करोड १७ लाख ६५ हजार, नेदरल्याण्डका लगानीकर्ताले २० करोड दुई लाख ६६ हजार, मलेसियाली लगानीकर्ताले छ करोड १६ लाख ५७ हजार लाभांश लगेका छन् भने बर्मुडाका उद्योगी तथा व्यवसायीहरुले पाँच करोड ३२ लाख, इटलीले दुई करोड ९४ लाख ५० हजार, श्रीलंकाली लगानीकर्ताले दुई करोड ४७ लाख १२ हजार, केम्यान आइसल्याण्डका लगानीकर्ताले ४६ लाख सात हजार, चीन (हङकङ) काले ९९ लाख ९० हजार र अमेरिकाका लगानीकर्ताले ५७ लाख ६४ हजार लाभांश लगेका छन् ।
विदेशी लगानीकर्ताहरुले लाभांश लैजानको लागि राष्ट्र बैंकसमक्ष लेखांकन गर्नुपर्ने हुन्छ । ‘उद्योग स्थापना तथा सञ्चालनको लागि लगानीकर्ताले केहीले रकम ल्याएर खर्च गर्छन् भन्ने निश्चित हुँदैन’, प्रवक्ता भट्टले भने, ‘तर लगानी गरेको प्रतिफल अर्थात् लाभांश लैजानको लागि लेखांकन आवश्यक छ र सोही आधारमा आफ्नो रकम लैजान सक्छन् ।’
बैंकले उद्योग विभाग र लगानी बोर्डलगायतका संस्थाहरुबाट आएको एफडीआई रकम लेखाङ्कन गर्ने गरेको छ । ‘हामीले विभागसमक्ष आउने तथा लगानी बोर्डमार्फत आउने अर्बौं रकमबराबरको रकम होस् वा साना, लघु तथा घरेलु उद्योगकै किन नहोस् सबै एफडीआई लेखाङ्कन गर्ने गरेका छौँ’, उनले भने । त्यसैगरी गत आवको असारमसान्तसम्म विदेशी लगानीकर्ताहरुले एफडीआईमार्फत नेपालको उद्योग क्षेत्रमा १४ अर्ब ६८ करोड रुपैयाँ ल्याएकोमा राष्ट्र बैंकले ११ अर्ब ४४ करोड १७ लाख स्वीकृत गरेको छ । विदेशी लगानीकर्ताहरुले उक्त रकम कृषिजन्य, बैंक तथा इन्स्योरेन्स, ऊर्जा, सूचना तथा प्रविधि, उत्पादन, सेवा र पर्यटन उद्योगमा लगानी गर्ने भन्दै स्वीकृत गराएका हुन् ।
उनीहरुले विदेशी लगानी तथा प्रविधि हस्तान्तरण ऐन २०७५ अनुसार नेपालको उद्योग क्षेत्रमा लागनी गर्न पाउँछन् । विदेशी लगानीकर्ताहरुले उद्योग क्षेत्रमा ल्याउने ठूलो लगानी रकम नेपालको उद्योग विभाग र लगानी बोर्डमार्फत ल्याउने गरेको पाइन्छ । विदेशी लगानीकर्ताहरुले विभागसमक्ष पाँच अर्ब रुपैयाँसम्मको लगानी ल्याउन सक्छन् भने बोर्डमा भने सोभन्दा माथिका रकम ल्याई आयोजना तथा परियोजनामा लगानी गर्न सक्नेछन् ।
क्याटेगोरी : समाचार
ताजा अपडेट
- अरुण नदीमा पूजा गर्ने क्रममा एक जना बेपत्ता
- चार महिनामा साढे चार खर्ब व्यापार घाटा
- ‘क्रेडिट रेटिङ’ पछि नेपालले लिनुपर्ने लाभ के हो ?
- समाजवाद स्थापना नभएसम्म क्रान्तिबाट विश्राम लिइन्न : महासचिव चन्द
- कञ्चनपुरको कलुवापुरमा बस दुर्घटना हुँदा ३१ जना घाइते
- इन्भेष्टमेन्ट कम्पनीको शेयर कारोबारसम्बन्धी नयाँ प्राबधान
- काठमाडौँमा शनिबार तीन शव भेटिए
- चिनियाँ दूतावासद्वारा ‘क्षत्रपाटी निःशुल्क चिकित्सालय’ लाई विद्युतीय सवारी हस्तान्तरण
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया