काठमाडौं, भदौ १८
अर्थमन्त्रीमा डा. युवराज खतिवडालाई नै निरन्तरता दिन प्रधानमन्त्री केपी शर्मा ओलीले फेरि अडान लिएका छन् । नेकपा स्थायी समिति बैठक बस्नु एक दिनअगाडि बुधबार नेकपाका अध्यक्षद्धय प्रधानमन्त्री ओली र पुष्पकमल दाहाल प्रचण्डबीच भएको संवादमा ओलीले २०७४ सालको प्रतिनिधिसभा र प्रदेशसभा निर्वाचनमा नेकपा एमाले र नेकपा माओवादी केन्द्रको साझा चुनावी घोषणापत्र लेखनका सदस्यसमेत रहेका खतिवडालाई राष्ट्रियसभा सदस्यमा मनोनीत गरेर अर्थमन्त्रीमा निरन्तरता दिने अडान राखेका हुन् ।
स्रोतका अनुसार प्रचण्ड बिहीबारको सचिवालय बैठकका साथै खतिवडालाई अर्थमन्त्रीमा निरन्तरता दिने वा नदिने भन्ने विषयमा छलफलका लागि प्रधानमन्त्री निवास बालुवाटार पुगेका थिए । तर, प्रधानमन्त्री ओलीले खतिवडालाई अर्थमन्त्रीबाट हटाउने पक्षमा आफू नभएको जानकारी प्रचण्डलाई गराएका छन् । केही दिन अगाडि एक टेलिभिजन अन्तर्वार्तामा पनि प्रधानमन्त्री ओलीले खतिवडाले अर्थमन्त्रीका रुपमा राम्रो काम गरेको र कार्यशैलीप्रति प्रश्न उठाउने छुट सबैलाई भएको बताएका थिए ।
खतिवडालाई अर्थमन्त्रीमा निरन्तरता दिन यसपटक भने सांसद बनाउनैपर्नेछ । अहिले सरकारको सिफारिसमा राष्ट्रपतिबाट मनोनीत हुने एक पद मात्र राष्ट्रियसभामा खाली छ । उक्त सांसद पदमा मनोनीत हुन नेकपाका नेता वामदेव गौतमले पनि प्रयास जारी राखेका छन् भने प्रधानमन्त्री ओलीले खतिवडालाई नै मनोनीत गर्ने अडान लिएका छन् ।
नेकपाले यसअघि नेता वामदेव गौतमलाई राष्ट्रियसभामा लैजाने निर्णय लिए पनि प्रधानमन्त्री ओलीले भने उपयुक्त समयमा गौतमलाई राष्ट्रियसभामा लैजाने निर्णय गरेको र कहिले लैजाने भन्ने मिति नतोकिएको कारण यसपटक खतिवडालाई नै राष्ट्रियसभामा लगेर अर्थमन्त्रीमा निरन्तरता दिने अडान लिएका हुन् । गौतमले पार्टीले आफूलाई राष्ट्रियसभामा लैजाने निर्णय गरिसकेको कारण अर्को व्यक्तिलाई लैजाने हो भने फेरि निर्णय गर्नुपर्ने अडान लिएका छन् । धेरैले प्रधानमन्त्री ओलीले आफू पदमा टिकिरहन वामदेवलाई राष्ट्रियसभामा लगेर खतिवडालाई अमेरिकाको राजदूत बनाउन लागेको हल्ला चलाए पनि त्यो सत्य नभएको ओली र प्रचण्डबीच बुधबार भएको संवादले पनि प्रष्ट पारेको छ ।
राजस्व ठगी गर्नेहरुले सुरुदेखि नै खतिवडालाई अर्थमन्त्रीबाट हटाउन विभिन्न उपायको खोजी गर्दै आएका थिए । अहिले उनीहरुले प्रचण्ड, माधव नेपाल, झलनाथ खनाल र वामदेव गौतमहरुलाई प्रयोग गरेका छन् । तर, प्रधानमन्त्री ओली भने धर्मराएका छैनन् । अर्थतन्त्रलाई दुरुपयोग गर्न पल्केकाहरुले अर्थशास्त्री खतिवडालाई अर्थमन्त्रीबाट विदा गरेर अर्थतन्त्रको जानकारी नभएका व्यक्तिलाई अर्थमन्त्री बनाएर रजाइँ गर्ने प्रयास गरेका छन् । त्यो प्रयासलाई सफल हुन नदिने अडानमा प्रधानमन्त्री ओली दृढ देखिएका छन् ।
नेपाल राष्ट्र बैंकको गभर्नर, राष्ट्रिय योजना आयोगको उपाध्यक्ष भइसकेका अर्थमन्त्री खतिवडा करछली गर्ने र दलाली अर्थतन्त्रको पक्षधरप्रति नरम छैनन् । विश्वका अन्य देशजस्तै नेपालमा पनि करछली गरेर धन आर्जन गर्नेको एउटा ठूलो गिरोह छ । त्यो गिरोह जुनसुकै देशमा पनि अर्थशास्त्री अर्थमन्त्री भएको हेर्न चाहँदैन । उनीहरु आफूले खेलाउनसक्ने अर्थमन्त्रीको खोजीमा हुन्छन् । नेपालमा पनि करछली गर्न पल्केकाहरु अर्थशास्त्री अर्थमन्त्री हटाउने खेलमा सबै अस्त्र प्रयोग गर्ने पक्षमा छन् । तर, यसलाई राम्रोसँग प्रधानमन्त्रीले बुझेका छन् । अहिले खतिवडालाई अर्थमन्त्रीबाट हटाउनु भनेको करछली गर्नेसँग झुक्नु भएको भन्दै प्रधानमन्त्री ओलीले खतिवडाको पक्ष लिएका हुन् ।
सांसदमा मनोनीत नहुने हो भने यही भदौ २० गते मध्यरातपछि अर्थमन्त्री खतिवडाको पद स्वतः समाप्त हुनेछ । राष्ट्रियसभाको दुई वर्षे कार्यकाल सकिएपछि खतिवडाले गत फागुन २० गते अर्थमन्त्री पदबाट राजीनामा दिएका थिए । त्यसको भोलिपल्टै खतिवडा संविधानको धारा ७८ को उपधारा १ बमोजिम मन्त्रीमा पुनः नियुक्त भएका थिए ।
संविधानको उक्त धाराअनुसार सांसद नभएको व्यक्ति छ महिनाको लागि मन्त्री बन्नसक्छ । त्यसपछि उक्त मन्त्री पद स्वतः समाप्त हुनेछ । खतिवडा २१ फागुनमा गैरसांसदको रुपमा अर्थमन्त्रीमा नियुक्त भएको कारण २० गते राति १२ बजेपछि उनको पद स्वतः समाप्त हुनलागेको हो । त्यही भएर खतिवडालाई अर्थमन्त्रीमा निरन्तरता दिनको लागि सांसद बनाउनैपर्छ । अहिले राष्ट्रियसभामा एक पद खाली छ । सरकारको सिफारिसमा सांसद बनेका खतिवडा गोला तान्दा दुईवर्षे कार्यकालमा परेका थिए । खतिवडाको राष्ट्रियसभाको त्यही दुईवर्षे कार्यकाल सकिएपछि सरकारबाट सिफारिस भएको व्यक्ति राष्ट्रपतिबाट मनोनीत हुने एक पद रिक्त हुन गएको हो ।
प्रधानमन्त्री ओली र प्रचण्डबीच छलफल सकिएपछि बुधबार साँझ नै प्रधानमन्त्री र नेता गौतमबीच पनि छलफल भएको छ । चार÷पाँच दिनदेखि प्रधानन्त्री ओलीले गौतमलाई फकाएर राष्ट्रियसभामा जाने अडान त्याग्न आग्रह गर्दै आएका छन् । गौतमले राष्ट्रियसभा जाने अडान त्यागेमा गौतम पत्नी कु. तुल्सी थापा मन्त्री बन्ने पक्काजस्तै छ । प्रधानमन्त्री ओली र नेता गौतमबीच सहमति नभएमा नेकपाभित्रको विवाद फेरि नयाँ रुपमा देखापर्नेछ ।
क्याटेगोरी : समाचार
ताजा अपडेट
- दुर्गा प्रसाईँको कसुर ‘पटके अपराध’ कायम भयो भने सजायमा के फरक पर्छ
- नेपाल-भारत सीमा सुरक्षा अधिकारीको बैठकमा छलफल भएका मुख्य चार विषय
- राष्ट्रिय गौरवका आयोजनालाई प्राथमिकता दिन रक्षा मन्त्रीको जोड
- विद्युत् विकासका लागि जर्मनीले एक अर्ब ४६ करोड अनुदान दिने
- बाढीपहिरोबाट ऊर्जा र सिँचाइ क्षेत्रमा १३ अर्ब बढीको क्षति
- शान्ति प्रक्रियालाई शीघ्र टुङ्ग्याउनुपर्नेमा आयोगको जोड
- अष्ट्रेलियाका राजदूत र प्रधानमन्त्री ओलीबिच शिष्टाचार भेट
- विश्व खाद्य संगठनका प्रतिनिधि र ऊर्जामन्त्री खड्काबिच भेटवार्ता
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया