काँगेल विमानस्थल मंसिरदेखि सञ्चालनमा आउने, महाकुलुङ विमानस्थलका लागि अर्को वर्ष बजेट
सोलुखुम्बु ।
सोलुखुम्बुको काँगेलडाँडा विमानस्थल मंसिरदेखि सञ्चालनमा आउने भएको छ । संस्कृति, पर्यटन तथा नागरिक उड्डयन मन्त्री योगेश भट्टराईले मंसिर दोस्रो सातादेखि काँगेलडाँडा विमानस्थल पुनः सुचारु गर्ने बताए । विमानस्थलको स्थलगत निरीक्षणमा सोलुखुम्बु आएका मन्त्री भट्टराईले काठमाडौँ फर्केपछि सम्बन्धित पक्षसँग छलफल गरी इच्छुक एयरलायन्सलाई उडान अनुमति दिने जानकारी दिए । करिब पाँच वर्षदेखि पूर्णरूपमा बन्द रहेको तथा गौचरणमा परिणत भएको विमानस्थलमा अब हप्ताको एक दिन उडान थाल्ने र यात्रुको चापअनुसार बढाइने मन्त्री भट्टराईले बताए ।
विमानस्थल सञ्चालनको लागि स्थानीय तहसँग समन्वय गरेर सञ्चालनको मापदण्ड तयार गरिने समेत उनको भनाइ छ । सोलुखुम्बुका संघीय सांसद हेमकुमार राईले विमानस्थल दिगोरूपमा सञ्चालनका लागि उपयुक्त मापदण्ड निर्माण गर्नुपर्नेमा जोड दिए । स्थानीय नागरिकको मागअनुसार विमानस्थलको स्तरोन्नत्ति गर्ने र सेवालाई निरन्तरता दिने राईको भनाइ छ । यस्तै प्रदेशसभा सदस्य एवं प्रदेश १ नेकपा संसदीय दल प्रमुख सचेतक बुद्धिकुमार राजभण्डारीले तीनै तहको सरकारको अनुदानबाटै भए पनि विमानस्थललाई नियमित सञ्चालन गर्नुपर्नेमा जोड दिए ।
काठमाडौँ–काँगेल र विराटनगर–काँगेल नै उडान सञ्चालनमा ल्याउने कोसिस गर्नुपर्ने भन्दै यदि तीमध्ये पनि जुन उपयुक्त हुन्छ सोहीअनुसार काम अगाडि बढाउनुपर्ने उनको भनाइ थियो । यस्तै प्रदेशका अर्का सदस्य उत्तम बस्नेतले गाउँ–गाउँमा सडक पुगेसँगै काँगेलडाँडा विमानस्थल सञ्चालनको बलियो आधार बन्दै गएको बताए । राज्यको करोडौँ लगानीमा निर्माण भएको विमानस्थल निरन्तर सञ्चालन गर्न सकेको खण्डमा ग्रामीण क्षेत्रका नागरिकले नै बढीभन्दा बढी लाभ लिन सक्ने बस्नेतको भनाइ छ । २०५२ सालमा निर्माण सुरु भएको विमानस्थलमा २०६२/०६३ देखि उडान सेवा सुरु भएको थियो । २०७२ सालसम्म नेपाल एयरलायन्स र तारा एयर एयरलायन्सले उडान भर्दै आएको विमानस्थलमा उडान बन्द भएपछि सुचारु गर्न जिल्लाका जनप्रतिनिधिहरू निरन्तर लागिपरेको थिए ।
यसैगरी मन्त्री भट्टराईले महाकुलुङ विमानस्थलको डीपीआर चाँडै निर्माण हुने बताएका छन् । काँगेलडाँडा विमानस्थलको स्थलगत अध्ययनपछि महाकुलुङमा निर्माण हुन लागेको विमानस्थलको निरीक्षण गर्दै मन्त्री भट्टराईले आगामी आर्थिक वर्षको बजेटमा महाकुलुङ विमानस्थललाई समावेश गर्ने प्रतिबद्धता व्यक्त गरे ।
सोलुखुम्बु देशकै सबैभन्दा बढी विमानस्थल भएको जिल्ला हो । यहाँ चारवटा विमानस्थल रहेका छन् । जसमध्ये दुईवटा विमानस्थल सञ्चालनमा छन् भने दुई विमानस्थलमा अहिले उडान हुन सकेको छैन । महाकुलुङ विमानस्थल निर्माण भएपछि जिल्लामा विमानस्थलको संख्या पाँच पुग्नेछ । मन्त्री भट्टराईले महाकुलुङ विमानस्थललाई तेञ्जिङ हिलारी विमानस्थलको विकल्पको रूपमा लिन सकिने पनि बताए । पर्यटकको चाप बढ्दै जाँदा तेञ्जिङ हिलारी विमानस्थलले थेग्न नसक्ने हुँदा महाकुलुङमा निर्माण हुँने विमानस्थल महत्वपूर्ण हुने मन्त्री भट्टराईको भनाइ छ । विमानस्थल सञ्चालनपछि मेरापिक, मुन्दुम ट्रेल पदमार्गमा आउने पर्यटकलाई समेत सहज हुने उनले बताए । यस्तै महाकुलुङ गाउँपालिकाले सञ्चालन गरेको फुट ट्रेललाई समय सान्दर्भिक भएको भन्दै सामुदायिक एकताको मन्त्री भट्टराईले प्रसंशा समेत गरेका छन ।
महाकुलुङ गाउँपालिका अध्यक्ष सागर किराँतीले महाकुलुङ विमानस्थल त्यस क्षेत्रका नागरिकको समेत जीवनस्तरसँग जोडिएको हुनाले द्रुतगतिमा निर्माण कार्य अगाडि बढाउन आग्रह गरे । अध्यक्ष किराँतीले मन्त्री भट्टराईलाई महाकुलुङ ताल, कुलुङ सांस्कृतिक संग्रहालय, मेरापिक रुटमा पर्ने बातेल्मा र लुक्तुम्मा, रक क्लाइमिङ सेन्टर, केबलकारको सम्भाव्यता अध्ययनका लागि, महाकुलुङ पदमार्गलगायतका ठूला विकासका आयोजनामा बजेट व्यवस्थापनका लागि माग पत्र समेत बुझाएका छन् ।
क्याटेगोरी : समाचार
ताजा अपडेट
- उपचार खर्च बेहोर्न नसक्ने जलनपीडितको निःशुल्क उपचार गर्ने निर्णय
- रास्वपा सभापति लामिछानेलाई ६ दिनको म्याद थप
- सङ्क्रमणकालीन न्यायनिरुपणका लागि समिति पुनर्गठन गर्ने सरकारको निर्णय
- बागमती प्रदेशको अध्यक्षमा महेश्वर श्रेष्ठ नियुक्त
- जलवायु परिवर्तनको असर विकराल बन्दै गएको छ: उपप्रधानमन्त्री सिंह
- इजरायली प्रधानमन्त्रीको निवासमा ड्रोन हमला
- जी–७ को रक्षा शिखर सम्मेलन इटालीमा सुरु
- अमेरिकी बजेट घाटा करिब दुई ट्रिलियन बढ्यो
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया