इलामको सन्दकपुरमा बीओपी स्थापना

इलाम ।
इलामको सन्दकपुर गाउँपालिका ५ स्थित जौवारीमा सशस्त्र प्रहरी बल, नेपाल बोर्डर आउट पोस्ट (बीओपी) जौवारी स्थापना भएको छ । प्रदेश नम्बर एकका आन्तरिक मामिला तथा कानुन मन्त्री हिक्मत कार्की तथा कृषि राज्यमन्त्री राम रानाले सोमबार आयोजित एक समारोहका बीच उक्त बीओपीको उद्घाटन गरेका हुन् । सशस्त्र प्रहरी बल, नेपाल नम्बर १ गण इलाम मातहतमा स्थापना भएको सो बीओपी सीमा सुरक्षा, सीमा क्षेत्रमा हुने चोरीपैठारी निकासी नियन्त्रण, सीमा अपराध नियन्त्रणलगायतका विविध कामकारबाहीहरूमा परिचालित हुनेछ ।

इलाम जिल्लाको सदरमुकामदेखि करिब ३९ किलोमिटरको दूरीमा नेपाल भारत सीमानाकाभन्दा करिब एक किलोमिटरवर स्थापना गरिएको उक्त बीओपीले सोमबारबाट नै दैनिक कार्य सुचारु गरेको छ । सशस्त्र प्रहरी बलको एक प्लाटुन टोली आवश्यक बन्दोबस्तीका सामानसहित सो ठाउँमा खटिएको हो । नेपाल सरकारको नीतिअनुरूप सीमानालाई अझ बजबुद बनाउनका लागि तथा सीमा अपराध नियन्त्रण र रोकथाम गर्नका लागि सशस्त्र प्रहरी बल, नेपालको बोर्डर आउट पोस्टहरू थप गर्दै लगिएको हो । हालसम्म एक सय ८९ वटा बोर्डर आउट पोस्ट स्थापना भइसकेको छ भने पहिलो चरणमा दुई सय २१ वटा बोर्डर आउट पोस्ट स्थापना गर्ने योजनाका साथ आवश्यक कार्य भइरहेको सशस्त्र प्रहरीले जनाएको छ ।