डेबिट कार्डबाट मात्र एक महिनामा चार अर्ब ९१ करोडको रुपैयाँ भुक्तानी

काठमाडौं ।
विश्व महामारी कोरोना संक्रमणका कारण बैंकिङ क्षेत्रमा विद्युुतीय भुक्तानी कारोबार उल्लेख्य बढेको छ । नेपाल राष्ट्र बैंकका अनुसार महामारी, विद्युतीय भुक्तानी पूर्वाधारमा भएको विकास, विद्युतीय भुक्तानी कारोबारका लागि गरिएको प्रोत्साहन र सर्वसाधारणको विद्युतीय भुक्तानी उपकरण प्रयोगमा बढ्दो अभ्यासको कारण विद्युतीय भुक्तानी कारोबार वृद्धि भएको हो ।

विद्युुतीय भुक्तानी कारोबारअन्तर्गत चालू आर्थिक वर्षको असोजमा मात्र ५९ लाख ५२ हजार छ सय ९३ पटकको डेबिट कार्डको प्रयोगबाट चार अर्ब ९१ करोड नौ लाख रुपैयाँको कारोबार भएको छ । सोही अवधिमा एक लाख २८ हजार चार सय ६० पटकको क्रेडिट कार्डको प्रयोगमार्फत सात करोड ६० लाख रुपैयाँको कारोबार भएको छ । यस अवधिमा प्रिपेड कार्डमार्फत भने सात हजार सात सय छ पटकमा ५८ लाख रुपैयाँ बराबरको रकम कारोबार भएको छ ।

राष्ट्र बैंकका अनुसार चालू आर्थिक वर्षको असोज मसान्तमा दुुई लाख ७५ हजार नौ सय ३३ पटकको इन्टरनेट बैंकिङमार्फत ६३ करोड १४ लाख रुपैयाँको कारोबार भएको छ । सो अवधिमा ७८ लाख ५० हजार एक सय ५४ पटकको मोबाइल बैंकिङमार्फत दुुई अर्ब ८८ करोड चार लाख रुपैयाँको कारोबार भएको छ । यसैगरी शाखारहित बैंकिङ कारोबारअन्तर्गत भने ४७ हजार छ सय ५० पटकको कारोबारमा १० करोड ६६ लाख रुपैयाँको कारोबार भएको छ । राष्ट्र बैंकका अनुसार यस अवधिमा वालेटमार्फत भने एक करोड एक लाख ७५ हजार नौ सय ६२ पटकको कारोबारमा ९८ करोड ८३ लाख रुपैयाँको काराबार भएको छ ।

नेपाली बैंकिङ क्षेत्रमा डेबिट कार्ड प्रयोगकर्ताहरूको संख्या ७३ लाख २९ हजार दुुई सयको हाराहारीमा छ । सोमध्ये वाणिज्य बैंकहरूमा डेबिट कार्ड प्रयोगकर्ताहरूको संख्या ७० लाख ६२ हजार चार सय ७२ रहेको छ भने विकास बैंकहरूमा यस्तो संख्या दुुई लाख ३१ हजार दुुई सय ८७ रहेको छ । यसैगरी फाइनान्स कम्पनीहरूमा भने डेबिट कार्ड प्रयोगकर्ता ग्राहकहरूको संख्या ३५ हजार चार सय ४३ रहेको छ ।

क्रेडिट कार्ड प्रयोगकर्ता ग्राहकको संख्या भने एक लाख ६० हजार तीन सयको हारामारीमा रहेको छ । विकास बैंक र फाइनान्स कम्पनीहरूमा भने क्रेडिट कार्ड प्रयोगकर्ताहरूको संख्या शून्य रहेको छ । राष्ट्र बैंकका अनुसार प्रिपेड कार्ड प्रयोगकर्ताहरूको कुल संख्या भने नेपाली बैैंकिङ क्षेत्रमा ६३ हजार सात सय ७५ रहेको छ । विकास बैंक र फाइनान्स कम्पनीहरूमा भने प्रिपेड कार्ड प्रयोगकर्ता ग्राहकहरूको संख्या शून्य रहेको छ ।