घुस लिएको आरोपमा सबइन्जिनियर पक्राउ

काठमाडौं ।
अख्तियार दुरूपयोग अनुसन्धान आयोगले एक लाख ५० हजार रूपैयाँ घुस लिएको आरोपमा सबइञ्जिनियर सुरेन्द्र अधिकारीलाई पक्राउ गरेको छ । अधिकारी तनहुँको भानु नगरपालिका कार्यक्षेत्र भई राष्ट्रिय पुनर्निर्माण प्राधिकरण जिल्ला आयोजना कार्यान्वयन एकाइ (शिक्षा) अन्तर्गत कार्यरत थिए ।

आयोगका अनुसार सबइन्जिनियर अधिकारीले आफ्नो कार्यक्षेत्रभित्रको विद्यालयको भौतिक संरचना निर्माणमा निकासा दिलाइदिएबापत घुस रकम माग गरेका थिए । आयोगको कार्यालय पोखराबाट खटिई गएको टोलीले अधिकारीलाई बुधबार सेवाग्राहीबाट एक लाख पचास हजार रूपैयाँ लिइसकेको अवस्थामा भानु नगरपालिका वडा नं.२ स्थित एक होटलबाट पक्राउ गरेको हो ।

जिल्लाको भानु नगरपालिका–५ मैवलस्थित सरस्वती माध्यमिक विद्यालयमा निर्माण गरिएको शौचालयको अनुगमन गरेबापत उक्त रकम घुस लिएको बताइएको छ । उक्त विद्यालयमा १४ लाख ६९ हजारको लागतमा शौचालय निर्माण गरिएको थियो । अधिकारीलाई कारबाहीको लागि थप अनुसन्धान भइरहेको आयोगले जनाएको छ ।