भारतबाट फर्किनेमध्ये दश प्रतिशतमा कोरोना सङ्क्रमण

काठमाडौँ ।

भारतको विभिन्न क्षेत्रमा मजदुरीका लागि गएका सुदूरपश्चिमका बासिन्दा विशु पर्व मनाउन यतिबेला घर फर्किनथालेका छन् । भारतलगायत तेस्रो मुलुकमा रोजगारीका लागि गएका अधिकांश व्यक्ति विशु पर्व (नयाँ वर्ष) मनाउन घर फर्किने गर्दछन् । सुदूरपश्चिम प्रदेशका पहाडी जिल्ला डडेल्धुरा, बैतडी, दार्चुला, बझाङ, डोटी, अछाम, बाजुरालगायतका जिल्लामा मौलिक तरिकाले विशु पर्व मनाउने गरिन्छ ।

कञ्चनपुरको पूर्वी गौरीफन्टा नाकाबाट स्वदेश फर्किनेमा कोरोना सङ्क्रमण फैलिने क्रम बढी देखिएको छ । एक सातामा त्यहाँको नाकाबाट भारतको विभिन्न सहरबाट पर्व मनाउन घर फर्किरहेका तीन सय जनामा कोरोना सङ्क्रमण देखिएको छ ।

आइतबार मात्रै तीन सय ३४ जनाको परीक्षण गर्दा ३० जनाको कोरोना सङ्क्रमण देखिएको पुनर्वास स्वास्थ्य एकाइले जनाएको छ । संक्रमणको दर हेर्दा समुदायस्तरमै फैलिएको अनुमान गरिएको छ । कोरोना सङ्क्रमित देखिएकालाई धनगढी आइसोलेसनमा पठाइरहेको छ ।

भारतबाट आउनेहरु सीमामा लुकिछिपी आउनुका साथै कोरोना परीक्षणविनै गाउँ पसिरहेकाले आम नागरिकले सतर्कता अपनाउनुपर्ने अवस्था पुनः आएको छ ।

एकै दिन तीन सय ६७ जनामा कोरोना
आइतबार नेपालमा थप तीन सय ६७ जनामा कोभिड­१९ पुष्टि भएको छ । उक्त अवधिमा तीन हजार एक सय २५ मा पीसीआर परीक्षण र छ सय ९० मा एन्टिजेन परीक्षण भएको थियो । पीसीआर विधिबाट परीक्षण गरिएका तीन सय तीन र एन्टिजेन परीक्षण गरिएका ६४ गरी तीन सय ६७ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयका प्रवक्ता डा जागेश्वर गौतमले जानकारी दिए ।

संक्रमितमध्ये उपत्यकामा मात्रै एक सय ५४ मा सङ्क्रमण देखिएको छ । आइतबार एक सय ४१ जना सङ्क्रमणमुक्त भएर घर फर्किएका छन् । सङ्क्रमणबाट मुक्त हुने दर ९७ दशमलव नौ प्रतिशत छ । मुलुकभरि आइसोलेसनमा रहेका ८९ मध्ये १५ भेन्टिलेटरमा छन् ।

बिहीबारदेखि आइतबारसम्म १४ हजार सात सय ३४ पीसीआर परीक्षण भएको मन्त्रालयले जनाएको छ । जसमा एक हजार दुई सय ६० मा सङ्क्रमण पुष्टि भएको छ । उक्त अवधिमा चार सय ९८ सङ्क्रमणमुक्त भएर घर फर्किएका छन् । आइतबार सक्रिय सङ्क्रमितको सङ्ख्या दुई हजार नौ सय ६१ छ । सङ्क्रमण बढ्दो क्रममा रहेकाले जनस्वास्थ्यका मापदण्ड पूर्ण प्रयोग गर्न अनुरोध गरिएको छ ।