बझाङमा महामारीमा दैनिक उपभोग्य वस्तुको मूल्यवृद्धि, उपभोक्ता मारमा

बझाङ ।कोरोना महामारीका बीच दैनिक उपभोग्य वस्तुको मूल्यवृद्धि भएपछि उपभोक्ता मारमा परेका छन् । निषेधाज्ञाको मौका छोप्दै उद्योगी, व्यापारी, र बिचौलियाहरूले चामल, तेल, दाल, गेडागुडी, चिनी र अण्डालगायत खाद्य वस्तुको मूल्यवृद्धि गरेका छन् ।

निषेधाज्ञाका कारण महामारीसँग लड्दै गरेका उपभोक्ताहरूको आम्दानीसमेत घटेको अवस्थामा अनेक बहानामा दैनिक उपभोग्य वस्तुको मूल्य बढाउने काम व्यापारीहरूबाट भइरहेको उपभोक्ताको गुनासो छ । खुद्रा व्यापार संघले दिएको जानकारीअनुसार निषेधाज्ञा सुरू हुनुभन्दा अघि प्रतिकिलो एक सय १० रूपैयाँ मूल्य रहेको मसुरोको दालको मूल्य यति बेला प्रतिकिलो एक सय २२ रूपैयाँ पुगेको छ ।

मासको दाल रूपैयाँले वृद्धि हुँदै एक सय ६५ बाट एक सय ७५ रूपैयाँ पुगेको छ । त्यसैगरी, हरेक ब्रान्डको चामलमा प्रतिबोरा दुई सय रूपैयाँदेखि तीन सय रूपैयाँसम्म मूल्य बढाइएको संघले बताएको छ । यतिबेला मूल्य बढाउनुपर्ने त्यस्तो खास कारण केही नभए पनि केही सीमित व्यापारी र बिचौलियाहरूले राजनीतिक तरलता र निषेधाज्ञाको बहानामा मूल्य बढाएको हुनसक्ने नागरिक समाजका अध्यक्ष धर्म जङ बहादुर सिंहले बताए । उनका अनुसार खाद्य वस्तुको व्यापारमा कालोबजारी मौलाएको छ । ‘यो समस्या न सरकारलाई हेर्ने फुर्सद छ न त उधोग वाज्यिय संघलाई यससम्बन्धी कुनै चासो छ,’ उनले भने । यही मौकामा थोक व्यापारीहरूले खुद्रा व्यापारीलाई सही मूल्यको बीलबीजक नदिने समस्या पनि उत्तिकै बढेको उनको भनाइ छ ।