सांसद चन्द्र भण्डारीको स्वास्थ्यमा सुधार हुँदै

काठमाडौं । उपचारका लागि मुम्बई लगिएका नेपाली कांग्रेसका सांसद चन्द्र भण्डारीको उपचार जारी छ। भण्डारीको स्वास्थ्यमा क्रमिक सुधार हुँदै गएको उनको उपचारमा संलग्न रहेका चिकित्सकहरूले जानकारी गराएका छन्।

कांग्रेस नेता योगराज कँडेलका अनुसार सांसद भण्डारीको प्लेटिलेट्सको मात्रा बढेको छ भने पिसाबको मात्रा नर्मल देखिएको चिकित्सकहरूले जानकारी दिएका छन्। उनको शरिरमा ज्वरो नभएको हुँदा भण्डारीको अवस्था सामान्य रहेको छ ।

‘सबै अंगहरूले नर्मल रूपमा काम गरिरहेको जानकारी डाक्टरहरूले दिनुभएको छ,’ कँडेलले भने, ‘अक्सिजन दिन छाडिएको छ र उहाँको स्वास्थ्य अवस्था सामान्य हुँदै गएको छ।’

गत फागुन ३ गते राति बुद्धनगरस्थित निवासमा ग्यास लिक भई आगलागी हुँदा सांसद भण्डारी र उनकी आमा गम्भीर घाइते भएका थिए। आमाको कीर्तिपुरस्थित अस्पतालमा उपचारका क्रममा फागुन ४ गते निधन भएको थियो। सोही दिन सांसद भण्डारीलाई थप उपचारका लागि भारतको मुम्बईस्थित नेशनल बर्न सेन्टरमा लगिएको थियो।