दुई करोड १२ लाख बेरुजु फछ्र्योटका लागि अटेरी गर्दै विद्यालय

सोलुखुम्बु,सोलुखुम्बुका विद्यालयले दुई करोडभन्दा बढी बेरुजु रकम फछ्र्योटका लागि अटेरी गरिरहेको पाइएको छ । जिल्लाका सात स्थानीय तहका विद्यालयले वर्षौँदेखिको दुई करोड १२ लाख १० हजार बेरुजु फछ्र्योटमा अटेरी गरेका हुन् ।

जिल्लाको नेचासल्यान गाउँपालिकाभित्रका विद्यालयले पाँच लाख, लिखुपिकेमा ७१ लाख ७५ हजार, सोलुदूधकुण्डमा २६ लाख १० हजार, माप्यदूधकोशीमा ३० लाख ७५ हजार, सोताङमा एक लाख २५ हजार, महाकुलुङमा छ लाख २५ हजार र थुलुङ दूधकोशी गाउँपालिकाका विद्यालयमा ७१ लाख रुपैयाँ बेरुजु रहेको शिक्षा विकास तथा समन्वय इकाइ सोलुखुम्बुका प्रमुख खगेन्द्र श्रेष्ठले बताए ।

वर्षौँअघिको बेरुजु फछ्र्योट गर्नका लागि उनले विद्यालयलाई आग्रह गरेका छन् । पटक–पटक आग्रह गरे पनि विद्यालयले अटेरी गरिरहेको शिक्षा विकास तथा समन्वय इकाइले जनाएको छ ।