पोखरा अन्तर्राष्ट्रिय विमानस्थलमा रात्रिकालीन उडान सुरु

काठमाडौं । पोखरा अन्तर्राष्ट्रिय विमानस्थललाई हब बनाएर बुद्ध एयरले पोखरा अन्तर्राष्ट्रिय विमानस्थलमा बिहीबार रातिदेखि चार गन्तव्यबाट रात्रिकालीन उडान सुरु गरेको छ ।

भद्रपुर, काठमाडौं, भैरहवा र नेपालगञ्जबाट पोखरामा रात्रिकालिन उडान भरेको छ । यी चारै गन्तव्यका जहाजको रात्रि बिसान पोखरामा भएको छ । कम्पनीका अनुसार बिहान पोखराबाट पुनः काठमाडौं, भैरहवा, नेपालगञ्ज तथा भद्रपुर उडान गरिएको छ । यसरी उडान गर्दा यात्रुहरुलाई साँझको समयमा पोखरा आई केही दिनको बसाई तथा घुमफिरगरी एकाबिहानै फेरि गन्तव्यमा फर्कन सजिलो भएको छ । यसरी उडान गर्दा आन्तरिकका साथै बाह्य पर्यटकहरुलाई पनि सजिलो हुने बुद्ध एयरले जनाएको छ ।

बुद्ध एयरले काठमाडौंपछि पोखराबाट देशका विभिन्न गन्तव्यलाई सिधा उडान भर्ने योजना अनुरुप अहिले नेपालगञ्ज, भैरहवा, भद्रपुर र चितवनलाई जोडेको छ । आउँदा दिनमा बजारको माग अनुसार अन्य गन्तव्यमा पनि विस्तार गर्ने बुद्ध एयरले जनाएको छ ।