संसद् अधिवेशन अन्त्य गर्नासाथ अध्यादेश

काठमाडौं । सबै कानुन संसद्बाट मात्र बनाउने प्रतिज्ञा गरेका कांग्रेस, माओवादीलगायतका दलहरुको गठबन्धनले फेरि संसद् अधिवेशन अन्त्य गरेको चौथो दिन नै अध्यादेश ल्याउने निर्णय गरेको छ ।

अघिल्लो संसद्को कार्यकालमा केपी शर्मा ओली नेतृत्वको सरकारले अध्यादेश धेरै ल्याएको भनेर आलोचना गरेका कांग्रेस, माओवादीलगायतका दलहरुले ओलीलाई विस्थापित गरेर सरकार बनाएपछि पनि अध्यादेशबाटै देश चलाउने प्रयास गरेका थिए । त्यतिबेला आलोचना भएपछि नयाँ संसद्बाट सरकार बनेपछि अध्यादेश ल्याउने काममा कडाइ हुने बताएका थिए ।

नयाँ संसद्को निर्वाचन भएपछि गठन भएको त्यही कांग्रेस, माओवादीलगायतका दलहरुको गठबन्धन सरकारले संसद्को अधिवेशन अन्त्य गर्नासाथ अध्यादेश ल्याउने निर्णय गरेको छ । गत शुक्रबार अर्थात् यही वैशाख १५ गते राति १२ बजेदेखि संसद्को अधिवेशन अन्त्य गरिएको थियो । त्यसको चार दिनपछि मंगलबार बसेको मन्त्रिपरिषद् बैठकले मिटरब्याज पीडितहरुका लागि अध्यादेशमार्फत कानुन बनाउने भनेर अध्यादेश जारी गर्न राष्ट्रपतिसमक्ष पठाउने निर्णय गरेको छ ।

यस्तो कानुन निर्माण गर्नुअघि संघीय संसद्मा गहन छलफल हुँदा छुटेका धेरै विषयहरु समावेश हुन पाउने थियो । संसद्को अधिवेशन अन्त्य भएको छोटै समयमा अध्यादेश ल्याउनाले सरकार अध्यादेशका लागि मात्र छिटो अधिवेशन अन्त्यका लागि हतारिएको देखिएको छ ।