कालिञ्चोकको कोसेली ‘सुन्द्रावतीको ग्रिन टी’

दोलखा । जिल्लाको कालिञ्चोक गाउँपालिका भ्रमण गर्न आउने पाहुनालाई सुन्द्रावतीमा उत्पादित ग्रिन टी खुवाउने र कोसेली पनि पठाउने गरेको छ । सुन्द्रावतीको कटुवाचौर बजार छेउको करिब ३५ रोपनी सार्वजनिक जग्गामा पाँच वर्षअघि चिया लगाइएको थियो । सोही चिया पालिकाले अहिले कोसेलीको रूपमा वितरण गर्ने गरेको छ । वडा नम्बर ९ का वडाध्यक्ष रामप्रसाद मैनालीको योजनाअनुसार २०७५ सालमा सो सार्वजनिक जग्गामा पुराना रुखबिरुवा हटाएर चिया खेती गरिएको थियो । लगाइएको पाँच वर्षमा नै उत्पादन दिन थालेको वडाध्यक्ष मैनालीले बताए । हातले टिपेर बनाएको चिया हिजोआज स्थानीय बजारमा ग्रिन टीको रूपमा बिक्री हुने गरेको उनले जानकारी दिए । दोलखा सदरमुकाम चरिकोट हुँदै सुन्द्रावती, कालिन्चोक, सिंगटी तथा लामाबगर घुम्न आउने पर्यटकलाई कोसेलीको रूपमा वडाले उत्पादन गरेको ग्रिन टी पठाउने गरेको उनले बताए ।

वडाले चिया बगानबाट टिपेको चियालाई प्याकिङ गरेर वडामा राख्ने गरेको छ । थोरै क्षेत्रमा चिया लगाएको हुँदा प्रशोधन गर्ने मेसिन ल्याउन नसकिएकाले ‘ग्रिन टी’को रूपमा चिया उत्पादन गर्न सुरु गरिएको उनले बताए । ग्रिन टी स्वास्थ्यका लागि पनि फाइदाजनक भएकाले धेरैले यसको खोजी गर्ने गरेको अध्यक्ष मैनालीले बताए । ‘स्थानीय बजारमा पनि हिजोआज मानिसले सुन्द्रावतीको ग्रिन टी नै पिउने गर्छन्’, अध्यक्ष मैनालीले भने, ‘ग्रिन टीका बारेमा पछिल्लो समय सबैले सुन्दै र थाहा पाउँदै आएका छौँ ।’