काठमाडौंबाट रसुवा हुँदै हुम्लामा खाद्यान्न

हुम्ला । नेपालको सङ्घीय राजधानी काठमाडौंबाट केरुङ नाका हुँदै हुम्लाको सदरमुकाम सिमकोटमा खाद्यान्न पु-याइने भएको छ । गाडी र पैदल मार्ग भएर चार हजार क्विन्टल खाद्यान्न सिमकोट पु-याइने भएको हो । खाद्य व्यवस्था तथा व्यापार कम्पनी लिमिटेडले काठमाडौंबाट रसुवाको केरुङ नाका हुँदै हुम्लामा खाद्यान्न पठाएको हुम्ला शाखाका प्रमुख कृष्णप्रसाद अधिकारीले बताए । उनका अनुसार साउन महिनाभरि हवाई उडान कम भएकाले हुम्लामा खाद्यान्न समस्या भएको छ ।

जिल्लामा खाद्यान्न समस्या देखिएको बेला केरुङ नाका हुँदै तिब्बती मार्गबाट हिल्सादेखि सिमकोटसम्म चार हजार क्विन्टल खाद्यान्न लोड भएका ४० वटा गाडीमा ढुवानी गरेर आइतबार काठमाडौंबाट छुटेको शाखा प्रमुख अधिकारीले बताए । अधिकारीका अनुसार यसअघि ढुवानीको जिम्मा पाएको सप्लायर्सले काठमाडौंमा खाद्यबाट खाद्यान्न बुझेर गाडी लोड गरिएको र तिब्बती मार्गबाट ढुवानी गर्न प्रक्रिया मिलाएर खाद्यान्न लोड गाडी हुम्लातर्फ लागेको छ । उक्त खाद्यान्नमा एक हजार क्विन्टल नाम्खा गाउँपालिकाका लागि र तीन हजार क्विन्टल सिमकोट शाखाका लागि ढुवानी हुन लागेको हो । तिब्बती मार्ग भएर ढुवानी भएर आउने खाद्यान्न हवाई मार्गबाट आउने खाद्यान्नभन्दा ढुवानी दर सस्तो पर्ने गरेको शाखा प्रमुख अधिकारीले बताए ।

काठमाडौं, केरुङ, तिब्बत र हिल्सा हुँदै सिमकोटसम्म पुग्ने खाद्यान्नप्रति क्विन्टल सात हजार पाँच सय रुपैयाँ, नाम्खा गाउँपालिकाको याल्वाङसम्म ढुवानी हुने प्रतिक्विन्टल खाद्यान्न चार हजार आठ सय रुपैयाँ ढुवानी लाग्नेछ । नेपालगञ्जबाट हवाई मार्गबाट ढुवानी हुने खाद्यान्नको हवाई भाडाप्रति क्विन्टल १६ हजार रुपैयाँ लाग्ने गर्छ भने सुर्खेतबाट प्रतिक्विन्टल १५ हजार पाँच सय रुपैयाँ लाग्ने खाद्यले जनाएको छ ।