गोली हानी प्रिन्सिपलको हत्या

काठमाडौं । अज्ञात समूहले बाराको कलैयास्थित बाल एकता बोर्डिङ स्कुलका सञ्चालक तथा प्रिन्सिपल रुपेश स्वर्णकारलाई गोली हानी हत्या गरेको छ। कलैया उपमहानगरपालिका– १ का ३५ वर्षीय स्वर्णकारलाई सोही उपमहानगपालिका–६ स्थित मदरसा टोलमा सोमबार दिँउसो मोटरसाइलमा आएका अज्ञात समूहले गोली प्रहार गरेका थिए । नम्बर नखुलेको २ वटा मोटरसाइकलकमा आएका चार जना अपरिचित व्यक्तिहरुले स्वर्णकारको टाउको र छातीमा गोली प्रहार गरेका थिए ।

गोली प्रहारबाट घाइते भएका उनको उपचारको क्रममा मृत्यू भएको जिल्ला प्रहरी कार्यालय बाराका प्रहरी उपरीक्षक सुरेश काफ्लेले जानकारी दिए । स्वर्णकारको वीरगञ्जस्थित नेपाल मेडिसिटी बयोधा अस्पतालमा उपचारको क्रममा मृत्यु भएको थियो । उनको शव हाल अस्पतालमै राखिएको छ ।

प्रहरीले घटनास्थलबाट पेस्तोलमा लाग्ने चारवटा खोका बरामद गरेको छ । स्वर्णकारलाई बजारबाट खाजा लिई स्कुलतर्फ जाँदै गर्दा गोली प्रहार भएको बुझिएको प्रहरीले जनाएको छ । घटनामा संलग्न फरार व्यक्तिहरूको खोजी गर्नुका साथै यस सम्बन्धमा प्रहरीले आवश्यक अनुसन्धान गरिरहेको प्रहरीले जनाएको छ । यस्तै प्रहरीले सो घटनामा शंकास्पद एक जनालाई नियन्त्रणमा लिएको छ । घटनामा पेसेवर सुटरहरुको प्रयोग गरिएको हुनसक्ने आशंका गरिएको छ । स्थानीयका अनुसार घटनालगत्तै उनीहरु सीमा क्षेत्रतिर भागेका थिए । स्वर्णकारलाई गोली हान्नुको कारण खुलेको छैन ।