वार्षिक १२ अर्बको हस्तकला निर्यात

काठमाडौं । नेपाल हस्तकला महासंघले नेपालबाट वार्षिक १२ अर्ब रुपैयाँ बराबरको हस्तकला विदेश निर्यात हुने गरेको जनाएको छ । महासंघले २०औँ हस्तकला व्यापार मेला तथा १८ औँ हस्तकला प्रतियोगिताबारे जानकारी दिन सोमबार राजधानीमा आयोजना गरेको पत्रकार सम्मेलनमा सो जानकारी दिइएको हो ।

महासंघका अध्यक्ष प्रचण्ड शाक्यले ६० भन्दा बढी देशमा नेपाली हस्तकला निर्यात हुने गरेको जानकारी दिए । यस्तै, उनले राष्ट्रिय अर्थतन्त्रमा नेपाली हस्तकला क्षेत्रको महत्वपूर्ण योगदान रहेकाले हस्तकलाको संरक्षण र संवद्र्धनमा सरकारले विशेष ध्यान दिनुपर्नेमा जोड दिए । महासंघले यही मंसिर २८ देखि पुस २ गतेसम्म १८औँ हस्तकला प्रतियोगिता र २०औँ हस्तकला व्यापार मेला आयोजना गर्न लागेको हो । दरबारमार्गस्थित होटल डेल अन्नपूर्णमा आयोजना गर्न लागिएको व्यापार मेला तथा प्रतियोगितामा तीन प्याभिलियनसहित एक सय ३० स्टल रहनेछन् । मेलामा पाकिस्तान, बांगलादेशलगायतका देशका व्यापारीहरूको समेत स्टल रहने छन् । महिला, अपांग र पिछडिएका वर्गलाई निःशुल्क स्टल प्रदान गरिने महासंघले जनाएको छ । मेलामा एक लाखभन्दा बढीले अवलोकन गर्ने अपेक्षा गरिएको छ । यस्तै, २० हजार जनालाई निःशुल्क पास वितरण गर्ने आयोजकको भनाइ छ ।

यसैगरी अठारौं हस्तकला प्रतियोगितामा परम्परागत विधातर्फ पौभा र समसामयिक विधातर्फ छ्वाली कलाको प्रतियोगिता गराइने छ । प्रतियोगितामा प्रथम पुरस्कार ५० हजार, द्वितीय पुरस्कार ३० हजार र तृतीय पुरस्कार २० हजार राखिएको छ । सो अवसरमा ७० वर्ष नाघेका १० जना ज्येष्ठ तथा वरिष्ठ कलाकारलाई सम्मान गरिनेछ ।