आशिष बहादुर सिंह
बझाड., भदौ २९
लामो समयदेखि बन्द अवस्थामा रहेको बझाङको देवल विमानस्थलको निमार्ण कार्य अन्तिम चरणमा पुगेको छ । एक दशकदेखि बन्द अवस्थामा रहेको देवल विमानस्थलको कालोपत्रेसहित वरिपरि घेरबार लगाउने काम र नाली निमार्णको काम सकिएको छ । टर्मिनल भवनबाहेकका अन्य भौतिक संरचनाको काम सम्पन्न भएसँगै विमानस्थलको निमार्ण कार्य अन्तिम चरणमा पुगेको छ । विमानस्थल सुचारु गर्न पटक–पटक दबाब दिएपछि नागरिक उड्डयन प्राधिकरणले २०७५ को साउन महिनामा विमानस्थल कालोपत्रेका लागि टेण्डर आह्वान गरेको थियो ।
करिब पाँच करोड ५० लाखको लागतमा १८ महिनाभित्र काम सम्पन्न गर्नेगरी अमर कन्स्ट्रक्सनले विमानस्थलको स्तरोन्नति गर्ने जिम्मा पाएको थियो । वैशाख महिनामै सम्पन्न गर्ने लक्ष्य भएको भए पनि कोरोना भाइरस अर्थात् कोभिड १९ का कारण भएको लकडाउनका कारण विमानस्थल निमार्णको काम प्रभावित भएको ठेकेदार कम्पनीका प्रतिनिधि प्रदीप डंगोलले बताए । उनले भने, ‘करिब छ सय ५० मिटर रनवे कालोपत्रे र वरिपरिको नालीको काम सकिएको छ ।
अब विमानस्थलको साइड फिलिङको काम मात्र बाँकी छ ।’ यो काम पनि भदौभित्रै सकिने र असोजको पहिलो साता परीक्षण उडानको तयारी समेत भइरहेको उनको भनाइ छ । एक दशकदेखि बन्द अवस्थामा रहेको विमानस्थल सुचारु हुने भएपछि यहाँका स्थानीय खुसी भएका छन् । लामो समयपछि विमान चढ्ने बझाङवासीको सपना पूरा हुने भएको छ ।
समयमै काम सम्पन्न भई विमान सञ्चालनमा आएपछि सुत्केरी महिला, दुर्घटनामा परेका व्यक्तिहरूले ज्यान गुमाउन नपर्ने स्थानीय प्रविन्द्र धामीले बताए । उनले भने, ‘हिउँदको समयमा जयपृथ्वी राजमार्गमा हिउँ जम्मा हुने र वर्षा भएको बेला विभिन्न ठाउँमा पहिरो गएर राजमार्ग अवरुद्ध हुने गरेको छ । जसका कारण यात्रुहरूले निकै सास्ती खेप्नु परेको छ । सडक अवरुद्ध हुँदा आपतकालीन बिरामीहरूले बाटोमै ज्यान गुमाउने गरेका छन् ।’
विमानस्थल सुचारु नहुँदा जिल्लामा आउने पर्यटकको संख्यामा कमि आएको पर्यटन व्यवसायी किशोर खडकाको भनाइ छ । उनले भने, ‘बझाङको सडक यात्रा अत्यन्त कष्टपूर्ण छ, विमानस्थल सञ्चालनमा आएपछि जिल्लाको साइपाल हिमाल, खप्तड राष्ट्रिय निकुञ्ज, सुर्मा ताल, कैलाश गुफा, कैलाश मानासरोवरलगायतका दर्जनभन्दा बढी धार्मिक तथा पर्यटकीय स्थलहरूमा घुम्न आउने आन्तरिक तथा बाह्य पर्यटकहरूको समेत वृद्धि हुनेछ ।’ विमानस्थलको स्तरोन्नतिको काम अन्तिम चरणमा पुगेको भए पनि अब सरोकारवालाहरूले नियमित जहाज उडाका लागि पहल गर्नुपर्ने बझाङवासीको भनाइ छ ।
२०३५ सालमा निर्माण भएको देवल विमानस्थलको स्तरोन्नति हुन नसक्दा जहाजले उडन भर्न सकेका थिएनन् । केही समय निगमबाहेकका निजी विमान कम्पनीहरूले पनि बझाङबाट नेपालगञ्ज र धनगढीका लागि उडान भर्ने गरेका थिए । बझाङबाट नेपालगन्ज जाने यात्रुको चाप घट्न थालेपछि निजी विमान कम्पनीहरूले पनि उडान रद्द गरेका थिए । अझै पनि धनगढी बझाङ उडान सञ्चालन गर्न सके दैनिक दुई वटा ट्वीनअटर लाइट गर्न सकिने सम्भावना रहेको विमान कम्पनीहरूले बताउँदै आएका छन् ।
तत्कालीन समयमा शाही नेपाल वायुसेवा निगमले साप्ताहिक रूपमा उडान सुरु गरेको भएपनि २०६५ सालमा बझाङ सदरमुकाम चैनपुरसम्म सडकको सजह पहुँच भएसँगै विमानस्थलमा कुनै पनि उडान भएका छैनन् । २०६६ सालमा नेपाल वायुसेवा निगमले बझाङ सदरमुकाममा रहेको आफ्नो कार्यालयसमेत बन्द गरेको थियो ।
क्याटेगोरी : बिबिध
ताजा अपडेट
- आठ वर्षपछि फेरि किन बढ्यो ‘लोडशेडिङ’ हुने डर ?
- युक्रेनलाई रुसी भूमिमा अमेरिकी क्षेप्यास्त्र प्रहार गर्ने अनुमति, रुसमा चर्को आक्रोश
- डेडिकेटेड ट्रंक लाइन बिबादमा टिओडी मिटर गणना गर्न विज्ञ समिति गठन
- मुख्यमन्त्री सिंहद्वारा भारतीय पक्षलाई विवाहपञ्चमीको निम्तोपत्र हस्तान्तरण
- जलवायु परिवर्तन न्यूनीकरणमा साझेदार गर्न नेपालको बङ्गादेशलाई आग्रह
- बेनी नगरपालिकामा तीन सय योजना कार्यान्वयनमा
- छुट्टाछुट्टै घटनामा दुईजनाको मृत्यु
- पशुपति आर्यघाटमा पूर्वसभामुख ढुंगानाको अन्त्येष्टि
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया