सोलुका तीन युवाद्वारा लोबुचे हिमालको सफल आरोहण

सोलुखुम्बु ।
सोलुखुम्बुका तीन युवाहरुले लोबुचे हिमालको सफलतापूर्वक आरोहण गरेका छन् । आन्तरिक पर्यटनलाई प्रोत्साहन गर्न भन्दै जिल्लाको सोलुदूधकुण्ड नगरपालिका १० टाप्टिङका लाक्पा शेर्पा, रिन्जि शेर्पा र थुलुङदूधकोशी गाउँपालिका वडा नम्बर ६ मुक्लीका विनोदमणि राईले बिहीबार जिल्लाको खुम्बु पासाङल्हामु गाउँपालिकामा रहेको हिमालको सफलतापूर्वक आरोहण गरेका हुन् ।

उनीहरुले वाङ्छु पिक प्रमोसन ट्रेक एण्ड एक्स्पिडिसनको व्यवस्थापनमा बिहीबार बिहान १० बजे चुचुरोमा पाइला टेक्न सफल भएको कम्पनीका अध्यक्ष लाक्पा शेर्पाले जानकारी दिए । बहराइनका राजकुमारसहितको टोलीले सिजनको पहिलो आरोहणका रुपमा छ हजार एक सय १९ मिटर उचाइको हिमाल आरोहण गरेको थियो । लोबुचे हिमाल आरोहण गर्ने यो टोली दोस्रो हो ।

कोरोनाका कारण यो वर्षको मुख्य सिजनमा समेत हिमाल आरोहण हुनसकेको थिएन । जिल्लाका स्थानीय युवाले सफल रुपमा आरोहण गरेपछि हिमाल आरोहणका लागि सुखद रहेको सन्देश समेत दिएको छ ।