एफएनसीसीआईका नवनिर्वाचित पदाधिकारीलाई नेपाल रत्न तथा आभूषण संघद्वारा स्वागत

काठमाडौं ।
नेपाल रत्न तथा आभूषण संघले नेपाल उद्योग वाणिज्य महासंघका नवनिर्वाचित पदाधिकारीहरूलाई सम्मान तथा स्वागत गरेको छ । संघले आइतबार काठमाडौंमा आयोजना गरेको स्वागत कार्यक्रममा महासंघका अध्यक्ष शेखर गोल्छाले निजी क्षेत्रको समस्या समाधान गर्ने विश्वासका साथ निर्वाचित गरेको भन्दै आफूहरूले सो विश्वासलाई कायम राख्न प्रयास गर्ने बताए ।

‘निजी क्षेत्रले एकमात्र नेतृत्व महासंघलाई मानेको हुँदा हामी सबै जनाले एक लक्ष्य र आवाजमा काम गर्नेछौँ’, अध्यक्ष गोल्छाले भने । उनले हालै महासंघभित्र समिति र फोरम गठन गरिसकेको भन्दै ती समिति र फोरमहरूलाई सक्रिय बनाएर निजी क्षेत्रको विभिन्न समस्याहरू समाधान गर्न पहल गर्ने बताए । हाल देशभित्र सुनचाँदीको गरगहना तयार गर्न दक्ष कामदारको अभाव देखिएको विषयमा जानकार रहेको भन्दै सो विषयलाई सम्बोधन गर्दै आगामी दिनमा नेपालभित्रै कामदार तयार पार्ने प्रयास गर्ने बताए ।

उनले नेपाली गरगहनाको निर्यातमा पनि चुनौती रहेको तर उच्च मूल्य प्राप्त गर्न सकिने सुनचाँदी गरगहनाको निर्यातका लागि समेत रत्न तथा आभूषण संघसँग सहकार्य गर्ने बताए । लगानीको वातावरणलाई सुधार्ने र कसरी दोहोरो अंकको आर्थिक वृद्धि हासिल गर्ने भन्ने योजनासहित काम भइरहेको भन्दै त्यसको लागि बृहत् छलफल समेत गरिने अध्यक्ष गोल्छाले बताए ।

त्यसैगरी वस्तुगत तर्फका उपाध्यक्ष अन्जन श्रेष्ठले रत्न तथा आभूषण संघसँग नजिकबाट सहकार्य गर्न तयार भएको भन्दै १० हजारभन्दा बढी सुन व्यवसायी रहेकोमा सरकारले कोटा लगाउनु दुःखद रहेको बताए । सुनको अभावले व्यवसायी र कालिगढ पलायन हुनसक्ने जोखिम भएको भन्दै उनले सो समस्या समाधान गर्न प्रयास गर्ने बताए ।