प्रहरी श्रीमती संघले मुसहरबस्तीमा राहत वितरण ग-यो

जनकपुरधाम ।
प्रहरी श्रीमती संघले जनकपुरधामको मुसहरबस्तीमा राहत वितरण गरेको छ । शीतलहरले प्रभावित भएका जनकपुरधाम उपमहानगरपालिका वडा नं. ७ र ८ का अतिगरिब मुसहर समुदायका एक सय २५ परिवारलाई राहत वितरण गरिएको हो । उक्त राहत वितरणमा प्रतिपरिवार एक बोरा चामल, दाल, नुन, खाने तेल, कम्बल, बच्चाका लागि न्यानो लुगा एवं जुत्ता प्रदान गरिएको नेपाल प्रहरी श्रीमती संघका केन्द्रीय अध्यक्ष सृजना थापाले बताइन् । गरिब तथा विपन्न वर्गका व्यक्तिलाई सहयोग गर्न संघले २०४१ साल देखि नै सुरु गरेको जानकारी दिइन् ।

कार्यक्रममा धनुषाका प्रमुख जिल्ला अधिकारी बन्धुप्रसाद बास्तोलाले चिसोको समयमा विपन्न समुदायलाई राहत दिएर नेपाल प्रहरी श्रीमती संघको निक्कै सराहनीय काम गरेको बताए । प्रहरी श्रीमती संघ प्रदेश नंं. २ का अध्यक्ष कुसुम लत्ता सिंहको अध्यक्षतामा भएको सो कार्यक्रममा नेपाल प्रहरीका प्रदेश नं.ं २ का प्रहरी नायव महानिरीक्षक धिरजप्रताप सिंह, सशस्त्र प्रहरीका प्रहरी नायव महानिरीक्षक चन्द्रप्रसाद गौतम, राष्ट्रिय अनुसन्धान विभागका प्रदेश प्रमुख सहितका अधिकारीहरू उपस्थित थिए ।