सेनाद्वारा निकुञ्जलाई भरुवा बन्दुक हस्तान्तरण

काठमाडौं ।
नेपाली सेनाले विभिन्न राष्ट्रिय निकुञ्ज निकुञ्जहरूको मध्यवर्ती क्षेत्रबाट भरुवा बन्दुकहरू बरामद गरी हस्तान्तरण गरेको छ । सेना र निकुञ्ज कार्यालयका प्रतिनिधिसहितको संयुक्त पट्रोल टोलीले माघ ७ गतेदेखि ११ गतेसम्म स्थानीय जनप्रतिनिधिहरूको सहयोगमा भरुवा बन्दुकहरू बरामद गरी हस्तान्तरण गरेको हो ।

सेनाले २५ नाल भरुवा बन्दुक शे–फोक्सुण्डो राष्ट्रिय निकुञ्ज कार्यालयमा बुझाएको छ । सेनाका अनुसार ७ गते जगदुल्ला गाउँपालिकाबाट स्थानीय जनप्रतिनिधिको रोहवरमा १६ नाल भरुवा बन्दुक बुझेको थियो भने ११ गते सोही गाउँपालिकाको सिम्लौना भन्ने स्थानमा रहेको गोठमा सर्च गर्दा दुई नाल थप भरुवा बन्दुक फेला परेको थियो ।

यस्तै सोही दिन डोल्पाको त्रिपुरासुन्दरी नगरपालिका वडा नं. ८ का वडा अध्यक्ष, मध्यवर्ती अध्यक्ष तथा स्थानीयको रोहवरमा पुनः थप सात नाल भरुवा बन्दुक बुझेको थियो । यसैगरी ११ गते नै बाँके राष्ट्रिय निकुञ्जअन्तर्गत दाङ जिल्ला बबई गाउँपालिका १ को खयरखुट्टीस्थित स्थानीय व्यक्तिको घरबाट समेत एक नाल भरुवा बन्दुक बरामद गरी बाँके राष्ट्रिय निकुञ्ज कार्यालयमा बुझाएको नेपाली सेनाले जनाएको छ ।

स्थानीय जनप्रतिनिधिहरूको सहयोगमा भरुवा बन्दुकजस्ता हातहतियारहरू सरकारी निकायलाई हस्तान्तरण गर्नु अति नै प्रशंसनीय कार्य रहेको र यसबाट स्थानीयवासीहरू सचेत हुँदै गएको एवं निकुञ्ज सुरक्षा प्रशासनको विश्वसनीयता बढ्दै गएको सेनाको भनाइ छ । यसप्रकारका पहलकदमीले निकुञ्ज तथा आसपास इलाकामा हुनेगरेका चोरी शिकारी तथा अवैध गतिविधि नियन्त्रणमा आउने विस्वास लिइएको नेपाली सेनाले बताएको छ ।