कोभिडविरुद्धको खोप सेवा सञ्चालनको तयारी पूरा

कञ्चनपुर ।
कञ्चनपुरमा कोभिडविरुद्धको खोप सेवा सञ्चालनको तयारी पूरा भएको छ । प्रथम चरणमा महाकाली अस्पतालमा कोभिड खोप केन्द्र स्थापना गरी आज बुधबारदेखि कोभिड खोप सेवा सञ्चालन गर्ने तयारी भएको प्रमुख जिल्ला अधिकारी रामकुमार महतोले बताए ।

उनका अनुसार पहिलो चरणमा खोप सेवा सञ्चालनको लागि महाकाली अस्पतालमा तीन जना खोप प्रदान गर्ने स्वास्थ्यकर्मी, दुई जना सरसफाइकर्मी र एक जना चिकित्सकलाई अभिमुखीकरण गरी तयारी अवस्थामा राखिएको छ । पहिलो चरणमा प्रचलित ऐन कानुनबमोजिम सूचीकृत भएका एवं सबै प्रकारका स्वास्थ्य संस्थामा कार्यरत कोभिड १९ व्यवस्थापनमा अग्रपंक्तिमा खटिने स्वास्थ्यकर्मी, सहयोगी कर्मचारी, एम्बुलेन्स तथा शववाहन चालक, कोभिडको संक्रमणबाट मृत्यु भएका शवहरुको व्यवस्थापनमा खटिने सुरक्षाकर्मी, स्थानीय तहमा कार्यरत फोहोर व्यवस्थापन तथा सरसफाइकर्मीलाई खोप लगाइने भएको छ ।

उक्त व्यक्तिहरुको विवरण तोकिएको ढाँचामा इन्फर्मेसन मेनेजमेन्ट युनिटमा सम्बन्धित निकायहरुले अद्यावधिक गर्ने कार्य गरी आईएफयु अद्यावधिक गरी खोप कार्ड प्राप्त गरेकाहरुलाई मात्र खोप लगाउने निर्णय भएको प्रमुख जिल्ला अधिकारी महतोले जानकारी दिए ।

प्रजिअ महतोको संयोजकत्वमा सोमबार बसेको जिल्ला कोभिड खोप समन्वय तथा अनुगमन समितिको बैठकले कञ्चनपुर जिल्लामा कोभिडविरुद्धको खोप प्राप्त भएपछि खोपको भण्डारण र आवश्यक सुरक्षा प्रबन्ध स्वास्थ्य कार्यालय र महाकाली अस्पतालले समन्वय गरी गर्ने निर्णय गरेको थियो ।