उद्योगलाई प्रतिस्पर्धी बनाई रोजगारी वृद्धि गर्न परिसंघको आग्रह

काठमाडौं ।
उत्पादनमूलक उद्योगहरूको क्षमता विकास र प्रतिस्पर्धी बनाई स्वदेशमा नै रोजगारी सृजना गर्न सरकारले सहज वातावरण तयार गर्नुपर्ने नेपाल उद्योग परिसंघले जनाएको छ । परिसंघका पदाधिकार र मुख्यसचिव शंकरदास वैरागीबीच मंगलबार सिंहदरबारमा भएको भेटमा परिसंघका अध्यक्ष सतिशकुमार मोरले विभिन्न क्षेत्रका उद्योगहरूले नेपालको कुल ग्राहस्थ्य उत्पादनमा पु-याएको योगदानलाई उजागर गर्दै उत्पादनमूलक उद्योगहरूको क्षमता विकास र प्रतिस्पर्धी बनाई स्वदेशमा नै रोजगारी सिर्जना गर्न नेपाल सरकारले सहज वातावरण तयार गर्नुपर्ने बताए ।

अध्यक्ष मोरले नेपालको युवाशक्तिहरू विदेशमा गएर रोजगारी गर्नुपर्ने बाध्यतालाई न्यूनीकरण गर्दै विदेशमा रहेका युवाहरूलाई पनि स्वदेशमा नै अवसर प्रदान गर्नको लागि दीर्घकालीन लक्ष्यहरू तय गरी सरकार र निजी क्षेत्र एकैसाथ अगाडि बढ्नुपर्नेमा जोड दिए ।

भेटमा परिसंघको अनुसन्धान इकाइले अध्ययन गरी तयार गरेको नेपालमा उद्योग दर्ताको स्थिति र त्यसबाट भएको रोजगारी सिर्जनाका सम्बन्धमा समेत छलफल भएको थियो । छलफलमा नेपालको अर्थतन्त्रलाई माथि उठाउनको लागि आयात प्रतिस्थापन गरी देशलाई आत्मनिर्भरतातर्फ उन्मुख गराउन सरकार र निजी क्षेत्रको सहकार्यलाई जोड दिइएको थियो ।

मुख्यसचिव वैरागीले नेपालमा कृषि क्षेत्रलाई प्रधानमन्त्रीबाट उच्च प्राथमिकतामा राखेको सन्दर्भ उल्लेख गर्दै कृषि क्षेत्रमा निजी क्षेत्रले रोजगारी सिर्जना गर्नसक्ने बताए । हाल सरकारले कृषि क्षेत्रमा पनि वैदेशिक लगानीलाई खुला गरेकोले यसतर्फ निजी क्षेत्रको ध्यान जानुपर्ने उनको भनाइ थियो । छलफलमा प्रधानमन्त्री तथा मन्त्रिपरिषद्को कार्यालयका सचिव तोयानारायण ज्ञवाली र परिसंघको तर्फबाट वरिष्ठ उपाध्यक्ष विष्णुकुमार अग्रवाल र उपाध्यक्ष अनुज अग्रवालको उपस्थिति थियो ।