प्रहरीद्वारा पछिल्लो २४ घण्टामा छ सय ७० थान अक्सिजन सिलिन्डर संकलन

काठमाडौं ।
अक्सिजनको अभावमा कोरोना संक्रमित बिरामीको ज्यान गइरहेको छ । अस्पतालहरूले अक्सिजन नभएको सूचना जारी गर्दै कोरोना संक्रमित बिरामीलाई अरु नै अस्पतालमा लैजान अनुरोध गर्न थालेका छन् । यस्तो अवस्थालाई मध्यनजर गर्दै नेपाल प्रहरीले सिलिन्डर संकलन कार्यलाई तीव्रता दिइरहेको छ ।

प्रहरीको सक्रियतामा देशभरका विभिन्न स्थानबाट पछिल्लो २४ घण्टामा छ सय ७० थान अक्सिजन सिलिन्डर संकलन गरिएको छ । तीमध्ये तीन सय ९१ भरिएका सिलिन्डर छन् भने दुई सय ७९ खाली सिलिन्डर रहेका छन् । संकलन गरिएका सिलिन्डरमध्ये चार सय ९७ वटा कोभिड अस्पताल र सम्बन्धित अक्सिजन प्लान्ट उद्योगलाई उपलब्ध गराइएको प्रहरीले जनाएको छ । बाँकी रहेका एक सय ७३ अक्सिजन सिलिन्डरहरू जिल्ला संकट व्यवस्थापन केद्र तथा जिल्लास्थित प्रहरी कार्यालयमा राखी आवश्यकताअनुसार वितरण गरिनेछ ।

कतिपय खाली सिलिन्डरलाई भर्नका लागि डिपोमा समेत पठाइएको प्रहरीको भनाइ छ । प्रहरीले आवश्यकताभन्दा बढी अक्सिजन सिलिन्डर होल्ड गर्ने अस्पताल, व्यक्तिलगायत अन्य संघसंस्था तथा स्वास्थ्य प्रयोजनबाहेक अन्य प्रयोजनमा प्रयोग गर्ने उद्देश्यले विभिन्न उद्योग, कलकारखाना, कवाडी, ग्यास वेल्डिङ, पसल तथा गोदामहरूमा स्टक गरी राखेका अक्सिजन सिलिन्डर नियन्त्रणमा लिई स्वास्थ्य तथा जनसंख्या मन्त्रालयले निर्धारण गरेको संख्याअनुसार वितरण गरेको हो ।

विश्वव्यापीरूपमा फैलिँदै गइरहेको नयाँ भेरियन्टसहितको कोभिड–१९ को दोस्रो चरणको संक्रमणको कारण महामारीले चरम रूप लिइरहेको विषम परिस्थितिमा यसको संक्रमण रोकथाम, नियन्त्रण तथा संक्रमण फैलिन नदिनका लागि राज्यको सम्पूर्ण संयन्त्र पूर्णरूपमा प्रयासरत रहेको अवस्थालाई ध्यानमा राखी नेपाल प्रहरीले समेत सक्रियता बढाएको हो । साथै स्वास्थ्य प्रयोजनबाहेक अन्य प्रयोजनका लागि स्टक राख्ने व्यक्ति तथा सम्बन्धित निकायलाई आवश्यक कारबाहीका लागि थप अनुसन्धान समेत भइरहेको प्रहरीले जनाएको छ ।

जथाभावी तवरबाट स्टक गरी प्रहरी कारबाहीमा फेला परेमा सम्बन्धित व्यक्ति वा निकायउपर प्रचलित ऐन कानुनबमोजिम कारबाही समेत हुनेछ । साथै प्रहरीले यस विषम परिस्थितिमा अन्य प्रयोजनका लागि स्टक नगर्न तथा विभिन्न कम्पनी, संघसंस्था तथा व्यक्तिहरूसँग आवश्यकताभन्दा बढी सिलिन्डर छन् भने त्यस्ता सिलिन्डरहरू उपलब्ध गराई सहयोग गर्न समेत आग्रह गरेको छ ।