धमाधाम कालोपत्रे हुँदै ग्रामीण सडक !

दोलखा ।
पछिल्लो समय नेपालका पहाडी तथा ग्रामीण सडक विस्तार तथा कालोपत्रे धमाधम भइरहेका छन् । धेरै पहिला निर्माण गरिएका सडकहरू पछिल्लो वर्षहरूमा धमाधम विस्तार भइरहेका हुन् । ३३ वर्षअघि विदेशीले निर्माण गरिदिएको चरीकोट–जिरी सडक विस्तारको कार्य भइरहेको छ ।

चरीकोटदेखि जिरीसम्मको ५५ किलोमिटर सडकमध्ये करिब ३२ किलोमिटर सडकको कालोपत्रे सकिएको छ । यस सडकको करिब ३५ वर्षपछि मुहार फेरिन लागेको हो । सडकले मुख्य व्यापारी केन्द्र चरीकोट–तामाकोशी हुँदै मैनापोखरी–खावा तथा जिरीलाई जोडेको छ ।

भारतीय एक्जिम बैंकको तीन अर्ब ७० करोड सहुलियत ऋणमा उक्त सडक विस्तार भएको हो । सडक विस्तारको जिम्मा लामा कन्स्ट्रक्सनले लिएको छ । हालसम्म सडकको चरीकोटदेखि नाम्दु र सिताथानदेखि खावा बजारसम्म ३२ किलोमिटर सडकको कालोपत्रे सकिएको छ । अबको करिब आठ महिनामा आयोजनाले ५५ किलोमिटर सडककै काम सक्ने लक्ष्य राखेको छ । त्यसैगरी जिल्लाका अन्य ग्रामीण सडक पनि अहिले धमाधम निर्माण भइरहेका छन् ।

जिल्लाको भीमेश्वर नगरपालिकाबाट शैलुङ जाने पाटीखोला–उखुबारी सडक कालोपत्रेले पनि गति लिएको छ । सडकको पहिलो चरणको कालोपत्रे सकिएको छ । त्यसैगरी जिल्लाको बैतेश्वर गाउँपालिको मैनापोखरी क्षत्रपा–फेदी सडकको कालोपत्रे भइरहेको छ भने मेलुङ–सिम्टे–लप्सी एक किलोमिटर सडकको कालोपत्रे अन्तिम चरणमा पुगेको छ ।

त्यसैगरी भीमेश्वर नगरपालिकाको जिलु कृषि सडक र बैतेश्वर गाउँपालिकाको बुस्ती पुतलीकाठ सडकको पनि कालोपत्रे भइरहेको छ । चरीकोट जिरी सडकबाहेकका अन्य ग्रामीण सडकको निर्माण स्थानीय सरकार तथा प्रदेश सरकार र केन्द्रीय सडकको सयुक्त अनुदानमा निर्माण भइरहेको सडक डिभिजन कार्यालय दोलखाले जनाएको छ ।