नेपालगञ्जमा मास्क बैंक स्थापना

बाँके ।
कोभिड नियन्त्रण तथा रोकथामका लागि खटिएका व्यक्ति तथा नागरिकहरुको लागि नेपालगञ्जमा मास्क बैंक सञ्चालनमा ल्याइएको छ । निःशुल्क मास्क उपलब्ध गराउने उद्देश्यले स्थापना गरिएको मास्क बैंकको सोमबार नेपालगञ्जका मेयर डा. धवल शमशेर राणा र उपमेयर उमा थापा मगरले उद्घाटन गरेका छन् । नेपालगञ्ज वडा नम्बर १० भृकुटीनगरमा सञ्चालन भएको मास्क बैंक नेपालिज अमेरिकन च्याम्बर आफ कमर्सको सहकार्यमा बासले स्थापना गरेको हो ।

पानी बैँक पनि सञ्चालनमा : यसअघि बाँकेमा नागरिक समाज व्यापारीस्तरबाट कोरोना संक्रमणपछि सहजै शुद्ध पानी पिउन समस्या हुनेहरुका लागि नेपालगञ्जका अगुवा व्यापारी ललित रौनियारले पानी बैंकको अवधारणालाई कार्यान्वयनमा ल्याएका छन् ।

विभिन्न व्यक्ति तथा संस्थासँगको समन्वय र सहयोगमा संकलन गरिएको पानी रौनियारले निषेधाज्ञासँगै खटिएका सुरक्षाकर्मीहरुलाई वितरणबाट अवधारणा कार्यान्वयनमा ल्याएका हुन् । अहिले पानी वितरण कार्यक्रमलाई अन्जनी माता रसोईमार्फत अस्पतालमा भर्ना भएका कोभिड बिरामीहरुलाई तथा नेपालगञ्ज उपमहानगरपालिकाले सञ्चालन गरेको आइसोलेसन केन्द्रहरुमा उपचाररत बिरामीहरुलाई उपलब्ध गराउन थालिएको रौनियारले जानकारी दिए ।

कोरोना अवधिभर पानी बैंक सञ्चालनको योजना रहेको रौनियारले बताए । पानी बैंकका लागि २० देखि पाँच सय पेटी पानीसम्मको सहयोग जुटिरहेको छ । उमेश रौनियार, पंकज रौनियारले पाँच सय पेटीका दरले पानी उपलब्ध गराएको पानी बैंकमा विभिन्न व्यक्तिहरुबाट सहयोग जुट्ने र वितरणको काम भइरहेको रौनियारले जानकारी दिए।