स्वरोजगार बनाउन महाबूका युवालाई सीपमूलक तालिम
खगेन्द्र राना मगर २०७८, फागुन २६ ११:३४ 
दैलेख । दैलेखको महाबू गाउँपालिकाले विपन्न युवाहरूलाई स्वरोजगार बनाउने उद्देश्यले यहाँका ८५ जना युवाहरूलाई सीपमूलक तालिम प्रदान गरेको छ । विपन्न, गरिबी, सुविधाविहीन, अति सीमान्तकृत तथा सीमान्तकृत युवाहरूलाई छनोट गरी सीपमूलक तालिम प्रदान गरिएको महाबू गाउँपालिका उद्योग विकास शाखा प्रमुख सुनमायाँ सुनारले जानकारी दिइन् ।
नेपाल सरकारको गरिबी निवारणका लागि लघुउद्यम कार्यक्रम (मेडपा) अन्तर्गत गाउँपालिकाका छवटै वडामा बसोवास गर्ने युवाहरूलाई तालिम प्रदान गरिएको उनले बताइन् । उनका अनुसार पालिकाभित्रका वडा नम्बर १, ३, ४ र ५ का युवाहरूलाई विभिन्न सीपमूलक तालिम प्रदान गरिसकिएको छ भने वडा नम्बर २ र ६ का युवाहरूलाई पनि लगत्तै (आगामी हप्तादेखि) नै तालिम सञ्चालन गर्न लागिएको छ । युवाहरूलाई छोटो अवधिको तालिम दिई रोजगारीमा लाग्न र स्वरोजगार बनाउनका लागि तालिम प्रदान गरिएको उनको भनाइ छ ।
कार्यक्रमअन्तर्गत पालिकाका १६ देखि ४० वर्ष उमेरसमूहका युवाहरूलाई फरक–फरक सीप विकास तालिम प्रदान गरिएको हो । चालू आर्थिक वर्ष २०७८÷७९ मा पालिकाको वडा नम्बर १ मा १९ जना युवाहरूलाई एकमहिने आधारभूत मोटर ड्राइभिङ तालिम प्रदान गरिएको छ । यस्तै वडा नम्बर ४ मा १० जना महिलाहरूलाई हाते होजियारी तालिम प्रदान गरिएको छ भने वडा नम्बर ३ का १८ जना महिलाहरूलाई बेमौसमी तरकारी सीप विकास तालिम प्रदान गरिएको छ । वडा नम्बर ५ का १० जना युवाहरूलाई तीन सय ९० घण्टे हाउस वायरिङ तालिम प्रदान गरिएको उनले जानकारी दिइन् ।
सीपमूलक तालिमअन्तर्गत वडा नम्बर २ मा १४ जना महिलाहरूलाई दुनाटपरी बनाउन र वडा नम्बर ६ मा १५ जना महिलाहरूलाई तीन सय ९० घण्टे सिलाइकटाइ तालिम केही दिनभित्रमा नै सञ्चालन गर्न लागिएको उद्योग विकास शाखाप्रमुख सुनारले बताइन् । उनका अनुसार तालिम प्राप्त गरेका युवाहरूले सिकेका सीप व्यवहारमा पनि लागू गर्न थालेका छन् । अझै पनि सयौँ युवा रोजगारीको खोजीका लागि भारतलगायत विभिन्न मुलुकमा जाने क्रम रोकिएको छैन । आफ्नै ठाउँमा स्वरोजगार बनाउने उद्देश्यले सीपमूलक तालिम सञ्चालन गर्दै आएको गाउँपालिकाका उपाध्यक्ष प्रेम कुमारी बुढाले बताइन् । समयको मागअनुसार तालिम सञ्चालन गरी सीपयुक्त जनशक्ति तयार गर्नु पालिकाको मुख्य उद्देश्य रहेको उपाध्यक्ष बुढाको भनाइ छ ।
सीप सिकेका युवाहरूलार्ई गाउँपालिकाले व्यवसाय सञ्चालमा सहयोग गर्ने र थप तालिम, सीप र उत्पादित सामग्रीको बजारीकरणमा पहल गर्ने समेत गर्ने उपाध्यक्ष बुढाले बताइन् । सीपमूलक तालिममा सहभागी युवाहरूले सीप सिकेर बेरोजगार बस्नु नपर्ने तथा सिकेको सीपको सदुपयोग गरी आत्मनिर्भर बन्न प्रेरणा मिलेको बताएका छन् । पालिकाले चालू आवमा ८५ जना नयाँ उद्यमी तयार गर्ने लक्ष्य लिएको छ । जसमध्ये ६० जना तयार भइसकेको र बाँकीलाई तालिम प्रदान गर्न लागिएको पालिकाले जनाएको छ ।
स्तरवृद्धि र प्रविधि हस्तान्तरण : यस्तै गाउँपालिकाले गत आर्थिक वर्षमा तालिम दिएका युवाहरूको स्तरवृद्धिका लागि छोटो अवधिको थप तालिम पनि प्रदान गरेको जनाएको छ । गत आर्थिक वर्षमा तालिम प्राप्त गरेर व्यवसायमा लागेका युवाहरूलाई सीप विकास र आयआर्जनमा थप टेवा पुगोस् भन्ने उद्देश्यले थप मात्रामा तालिम प्रदान गरिएको उपाध्यक्ष बुढाले जानकारी दिइन् ।
स्तरवृद्धिअन्तर्गत वडा नम्बर ३ का १० जनालाई एकमहिने सिलाइकटाइ तालिमसँगै आइरन मेसिन उपलब्ध गराइएको थियो । यस्तै वडा नम्बर १ मा पाँचदिने तरकारी सीप विकास तालिमसँगै १० जनालाई पानी भर्ने ड्रम र सिँचाइ गर्ने हजारी उपलब्ध गराइएको छ । पालिकाका अनुसार नम्बर ४ का १५ जना युवाहरूलाई स्तरउन्नतिका लागि थप १८ दिने मोटर ड्राइभिङ तालिम पनि प्रदान गरिएको छ । यस्तै गाउँपालिका र उद्योग तथा उपभोक्ता संरक्षण कार्यालय दैलेखको सहकार्यमा पालिकाभित्रका १० जना पुरुषहरूलाई कोट पाइन्ट सिलाइकटाइसम्बन्धी तालिम प्रदान गरिनुका साथै १० जनालाई होमस्टे व्यवस्थापनसम्बन्धी तालिम प्रदान गरिएको छ ।
क्याटेगोरी : बिबिध
ताजा अपडेट
- चीन भ्रमणमा ऋणसम्बन्धी सम्झौता नहुने: प्रधानमन्त्री
- टेक्ससको ड्यालसमा एक सय दश जनाद्वारा रक्तदान
- १५ दशमलव ८३ बिन्दुले उक्लियो शेयर बजार
- विमान चालकको समस्या छिट्टै समाधान हुन्छ: वायुसेवा निगम
- ‘स्मार्ट सिटी हुनका लागि हिंसारहित समाज हुनु अनिवार्य छ’
- आज साँझ ५ बजे मन्त्रिपरिषद् बैठक बस्ने
- काठमाडौँमा बुधबारदेखि जनसङ्ख्या र विकाससम्बन्धी छैटौँ अन्तर्राष्ट्रिय सम्मेलन
- छोराद्वारा बुबाको हत्या
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया