पहिरोले घरखेत तानेपछि धमाधम गाउँ छाड्दै लापिलाङका स्थानीय
सुबास बस्नेत २०७९, भदौ १५ ११:१८ 
दोलखा । विगत तीन वर्षदेखि जिल्लाको उत्तरी क्षेत्र कालिञ्चोक गाउँपालिका वडा नम्बर–५ लापिलाङमा लगातार पहिरोले बस्ती तानिरहेको छ । पहिरोले घरसँगै खेतबारी पनि बगाएपछि पछिल्लो समय यहाँका दर्जनौँ स्थानीयले गाउँ छोडेर हिँडेका छन् । पहिरोले यहाँका सयौँ घर उच्च जोखिममा छन् भने दर्जनौँ घर–परिवारलाई घरजग्गाविहीन बनाएको छ ।
पहिरोले पुख्र्यौली सम्पत्तिको नामनिशान मेटाउन थालेपछि पछिल्लो समय गाउँ छोडेर हिँड्नेको संख्या वृद्धि हुँदै गएको कालिञ्चोक–५ लापिलाङका वडाअध्यक्ष सहदेव खड्काले जानकारी दिए । वडा अध्यक्ष खड्काका अनुसार पहिरोका कारण दुई गाउँका १६ घरपरिवारले गाउँ छाडिसकेका छन् । गाउँ छाड्नेमा वडानम्बर–५ कात्तिके टोलका ११ घर नेवार परिवार रहेका छन् भने मिजार टोलका छ घरपरिवारले पनि गाउँ छोडेर सहर पसेको उनले बताए । चारैतिरबाट पहिरोले चिरा पारेको घर तथा खेतीयोग्य जमिन बगाएका कारण गुजारा चलाउनैका लागि पहिरो पीडितले गाउँ छाडेर अन्यत्र हिँडेको वडा अध्यक्ष खड्काले बताए । पहिरोले हातमुख जोड्ने सबै खेतबारी र भूकम्पपछि निर्माण गरेको घर नै बगाएकाले गाउँ छोडेर हिँड्नुपरेको स्थानीय पहिरोपीडितहरूको दुखेसो छ ।
लापिलाङ पहिरोले मानवीय क्षति नगरे पनि हालसम्म दुई दर्जन बढी घरपरिवारलाई पूर्णरूपमा विस्थापित बनाएको छ । तीन वर्षदेखि आइरहेको पहिरोले यसवर्ष थप चार घर बगाएको छ भने चार दर्जन बढी घरपरिवारलाई प्रभावित बनाएको छ । रानीभिरबाट खस्न सुरु भएको पहिरोले अहिले आधा बस्ती बगाइसकेको छ ।
पहिरोले तीन वर्षको अवधिमा पाँच सय रोपनीभन्दा बढी खेतीयोग्य जमिन र २२ घर बगाइसकेको छ । त्यस्तै पहिरोले पाँचवटा वडाको मुख्य राजमार्ग सुनखानी–साँवा सडकलाई पनि तान्न सुरु गरेको छ । पहिरोले सडकभन्दा तल्लो क्षेत्रमा रहेका घर तानेर सडक नै तान्न थालेको अध्यक्ष खड्काले बताए । कालिञ्चोक गाउँपालिकाभित्रका पाँच वडाहरू र बिगु गाउँपालिकाका केही वडा जोड्ने मुख्य राजमार्गको रूपमा रहेको सुनखानी–साँवा सडकखण्डको लापिलाङ खण्डमा पहिरोले सडक तानेको हो ।
पहिरोले सडक तानेपछि पालिकाका पाँच वडा हुँदै चल्ने मुख्य सडक अवरुद्ध बनेको छ । पहिरोले सुनखानी–साँवा सडकखण्डको लापिलाङमा करिब ८० मिटर सडक भासिएको छ भने १५ मिटर सडक पूर्णरूपमा चिरिएको छ । पहिरोले सडक तानेसँगै सडकभन्दा माथिल्लो बस्तीका ४५ घरपरिवार थप जोखिममा परेको वडा अध्यक्ष खड्काले बताए । पहिरोले सडक भत्काएसँगै सवारी ओहोरदोहोर र स्थानीयलाई एक गाउँदेखि अर्को गाउँ जानआउन समेत समस्या भएको छ ।
क्याटेगोरी : बिबिध
ताजा अपडेट
- मोटरसाइकल दुर्घटनामा एकको मृत्यु
- यस्तो छ आजका लागि विदेशी मुद्राको विनिमय दर
- एमाले इलामको अध्यक्षमा बराल निर्वाचित
- ‘चाइना कार्ड’ भन्दै पूर्व प्रधानमन्त्री प्रचण्डले दिएको अभिव्यक्तिप्रति आपत्ति
- स्थानीय तह उपनिर्वाचनस् कांग्रेसले चयन गर्यो कोशी र गण्डकी प्रदेशका उम्मेदवार
- डिजेल र मट्टितेलको मूल्य बढ्यो
- आयात रोकिएपछि नेपाली महले बजार पाउन थाल्यो
- प्याजका बिरुवा बेचेर डेढ लाख कमाइ
धेरैले पढेको
- सुनचाँदीमा सिन्डिकेट लगाएको भन्दै नेपाल राष्ट्र बैंकविरुद्ध सर्वोच्चको कारण देखाऊ आदेश
- समसामयिक राजनीतिक व्यङ्ग्य
- चिया पसल पनि कम्पनी ?
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- राजेन्द्र विमल र हरिहर शर्मालाई पुरस्कृत गरिने
- एक्सेल डेभलपमेन्ट बैंकको ट्राफिक प्रहरीलाई सहयोग
- इन्फिनिटी लघुवित्तको सातै प्रदेशमा तालिम सम्पन्न
तपाईको प्रतिक्रिया