च्छोरोल्पा हिमतालमा पर्यटकको घुइँचो

दोलखा । जिल्लाको गौरीशङकर गाउँपालिका–९ स्थित च्छोरोल्पा हिमताल जाने पर्यटकको घुइँचो लाग्न थालेको छ । वर्षात्को समयमा आवतजावत करिब बन्द रहेको च्छोरोल्पा हिमताल जाने पदयात्रुको संख्यामा असोज महिनादेखि भने उल्लेख्य वृद्धि भएको हो ।

हिमताल क्षेत्रमा जाने पर्यटकहरूको घुइँचो लाग्न थालेको स्थानीय मिङमा शेर्पाले जानकारी दिए । समुद्र्र सतहबाट चार हजार पाँच सय ८० मिटरको उचाइमा रहेको सो तालसम्म पुग्न पाँच दिनको पैदल यात्रा गनुपर्ने हुन्छ । गौरीशङ्कर गाउँपालिकाको रोल्वालिङ उपत्यकामा रहेको सो स्थान पदयात्राका लागि अति नै रमणीय एवम् रोमाञ्चक स्थलको रूपमा रहेकाले सबैको आकर्षणको केन्द्र बन्दै गइरहेको स्थानीय रत्ना तामाङले बताइन् ।

उनका अनुसार कोरोना महामारीअघि बाह्य पर्यटकले खचाखच हुने गथ्र्यो । अहिले महामारी सकिए पनि फाटुफुटबाहेक खासै बाह्य पर्यटक आएका छैनन् । तर आन्तरिक पर्यटकहरूको भने भीड लाग्ने छ । आन्तरिक पर्यटकहरुको भीडले होटल व्यवसायीहरूलाई धान्न हम्मेहम्मे परेको होटल व्यवसायी थुल्डु शेर्पाले बताए ।

यो दशैं तथा तिहारको समयमा मात्रै करिब एक हजार आन्तरिक पर्यटकले हिमतालको भ्रमण गरेका छन् । साथै, सो संख्या दिनप्रतिदिन बढ्दै गइरहेको छ । सिमीगाउँबाट सुरमुर्चे, क्याल्चे, दोङयाङ, वेदिङ र ना हुँदै यो तालसम्म पुग्न सकिन्छ । साहसिक पदयात्राका लागि अति नै रमणीय एवम् रोमाञ्चक स्थलको रूपमा प्रख्यात मानिने रोल्वालिङ उपत्यकाको च्छोरोल्पा पुग्दा संसार जितेको महसुस हुने आन्तरिक पर्यटकहरूको भनाइ रहेको छ ।