पोखरालाई छिट्टै पर्यटकीय राजधानी घोषणा गरिने

पोखरा । गण्डकी प्रदेशका मुख्यमन्त्री सुरेन्द्रराज पाण्डेले पोखरालाई छिट्टै पर्यटकीय राजधानी घोषणा गर्ने बताएका छन् । पोखरा उद्योग वाणिज्य सङ्घको आयोजनामा बिहीबारदेखि सुरु भएको ३२औँ राष्ट्रिय औद्योगिक व्यापार मेलाको उद्घाटन गर्दै उनले पर्यटकीय राजधानी घोषणाका लागि अध्ययन कार्यदल बनेको जानकारी दिए ।

कार्यदको प्रतिवेदन आइसकेपछि आवश्यक पूर्वाधार तयारीमा लाग्ने उनले बताए । पोखरालाई देशकै पर्यटनको केन्द्रका रूपमा स्थापित गर्न सबै पक्षको साथ सहयोग चाहिने उनको भनाइ छ । यस्तै, उनले फेवातालको मापदण्ड मिचेर बनाइएका अवैध संरचना हटाउन भनी सर्वोच्च अदालतले दिएको आदेश कार्यान्वयनमा प्रदेश सरकार प्रतिबद्ध रहेको बताए । ‘यो स्थानीय, प्रदेश र सङ्घ तीनै तहका सरकारसँग जोडिएको विषय हो, अदालतको फैसला कार्यान्वयन गर्नुको विकल्प छैन’, मुख्यमन्त्री पाण्डेले भने, ‘सम्बन्धित पक्षहरूसँग आवश्यक छलफल गरेर समाधान निकाल्नुपर्ने आवश्यकता छ ।’ कार्यक्रममा उनले उद्योगी–व्यवसायीको हितका लागि नीति निर्माणदेखि आवश्यक सहयोग गर्न समेत प्रदेश सरकार तयार रहेको बताए । मुख्यमन्त्री पाण्डेले बेरोजगारीको समस्याले युवा पलायनको अवस्था भोग्नुपरेको उल्लेख गरे । बेला–बेलामा आयोजना हुने मेला महोत्सवले स्थानीय अर्थतन्त्र चलायमान बनाउन मद्दत पुग्ने उनको भनाइ थियो ।

कार्यक्रममा गण्डकी प्रदेशका उद्योग, पर्यटन, वन तथा वातावरणमन्त्री दीपेन्द्रबहादुर थापाले मेला महोत्सवले आर्थिक गतिविधि बढ्ने बताए । मन्दीको चपेटामा परेका उद्योग, व्यवसायीलाई महोत्सवले थोरै भए पनि राहत पुग्ने उनको विश्वास थियो । कार्यक्रममा पोखरा उद्योग वाणिज्य सङ्घका अध्यक्ष पवनकुमार प्रजापतिले औद्योगिक, सूचना, प्रविधि, कृषिजन्य, हस्तकलालगायत उत्पादनको प्रवद्र्धन तथा बजारीकरणका लागि मेला आयोजना गरिएको बताए । पोखराको नयाँबजारस्थित प्रदर्शनी केन्द्रमा सञ्चालित मेलामा ९० लाख रुपैयाँ आम्दानी हुने र ८० लाख रुपैयाँ खर्च हुने अनुमान गरिएको छ ।