एक दर्जन फार्मेसीमा अनुगमन, लाखौंको औषधि जफत

सोलुखुम्बु । सोलुखुम्बुमा एकैपटक झण्डै एक दर्जन औषधि पसल(फार्मेसी)मा अनुगमन गरिएको छ । जिल्ला बजार अनुगमन समितिले सदरमु्काम सल्लेरीसहित फाप्लु, नेले र नाम्चेका गरी ११ वटा औषधि पसलहरूको अनुगमन गरेको हो ।

अनुगमनबाट म्याद नाघेका करिब डेढ लाख मूल्य बराबरको औषधि जफत गरी नष्ट गरिएको प्रमुख जिल्ला अधिकारी(सीडीओ) बसन्त भट्टराईले जानकारी दिए । उनका अनुसार कतिपय औषधि पसलमा फार्मेसी अध्ययन नगरेका व्यक्तिले औषधि बिक्री गरिरहेको, फार्मेसी दर्ता नभएको तथा लाइसेन्सविना नै औषधि बिक्री गरिरहेको पाइएको छ । ती औषधि पसललाई कागजात पूरा गर्न एक हप्ताको अल्टिमेटम दिइएको छ । सो अवधिमा पनि मापदण्ड पूरा नगरे कानुनअनुसार कारबाही प्रक्रियामा जाने सीडीओ भट्टराईले बताए । नेले क्षेत्रको एउटा औषधि पसलले संस्था दर्ता गरेर औषधि बिक्री गरिरहेको समेत अनुगमनमा भेटिएको छ । औषधिजस्तो विषयमा अतिसंवेदनशील हुनुपर्ने भएकाले कसैमा पनि कियरलेस गर्ने छुट नभएको सीडीओ भट्टराईको भनाइ छ । फार्मेसी अनुगमनमा जिल्लास्थित स्वास्थ्य कार्यालय, जिल्ला प्रशासन कार्यालय, घरेलु तथा साना उद्योग कार्यालय, उद्योग वाणिज्य संघ, नगरपालिका, नेपाल प्रहरी, अनुसन्धान, नगरप्रहरी, सञ्चारकर्मीलगायतका प्रतिनिधिहरू सहभागी थिए ।