कोशीमा पुन: एमालेको सरकार

काठमाडौं । कोशी प्रदेशमा पुनः नेकपा एमालेको सरकार गठन हुने भएको छ । सर्वोच्च अदालतले गठबन्धन सरकारका मुख्यमन्त्री उद्धव थापाले लिएको विश्वासको मत संविधानविपरीत रहेको ठहर गर्दै सबैभन्दा ठूलो दल एमाले संसदीय दलका नेतालाई मुख्यमन्त्रीमा नियुक्त गर्न प्रदेशप्रमुखलाई ४८ घण्टाको परमादेश दिएपछि एमालेको अल्पमतको सरकार गठन हुने भएको हो । न्यायाधीधहरु सपना प्रधान मल्ल, डा. कुमार चुडाल र नहकुल सुवेदीको पूर्ण इजलासले सो परमादेश दिएको हो ।

सर्वोच्चको फैसलाअनुसार थापा पदमुक्त मात्र भएनन् सरकार गठन गर्ने एउटा मात्र विकल्पमा पटक–पटक अभ्यास नगर्न भनिएको छ । यसले मिलीजुली सरकार एक पटक असफल भएमा अर्को पटक ठूलो दल र त्यो ठूलो दलको सरकारले पनि विश्वासको मत लिन नसकेमा विश्वासको मत लिनसक्ने जुनसुकै प्रदेशसभा सदस्यलाई मुख्यमन्त्रीमा नियुक्त गर्नुपर्नेछ ।

सर्वोच्चको परमादेशअनुसार शुक्रबार साँझसम्म एमाले संसदीय दलका नेता हिक्मतकुमार कार्की मुख्यमन्त्री नियुक्त हुनेछन् । उनले पनि ३० दिनभित्रमा प्रदेशसभाबाट विश्वासको मत लिनुपर्नेछ । उनले विश्वासको मत लिन नसकेमा प्रदेशसभाका जुनसुकै सदस्यले आफूले विश्वासको मत लिन सक्छु भनेर सरकार गठन गर्न दाबी गर्नुपर्नेछ । तर, त्यो दाबी गर्दा यो–यो प्रदेशसभा सदस्यले आफूलाई मत दिनेछन् भनेर लिखित दाबी प्रस्तुत गर्नुपर्नेछ ।

मुख्यमन्त्रीमा नियुक्त गर्न परमादेश जारी भएसँगै एमालेले मिलिजुली सरकार गठन गरेर मध्यावधि निर्वाचन गर्नबाट रोक्न आग्रह गरेको छ । एक एमाले नेताले भने, अब एमालेको नेतृत्वमा मिलिजुली सरकार गठन गरेर मध्यावधिलाई टार्नुपर्छ । तर, एमाले नेतृत्वको सरकारमा अरु दलहरू सामेल हुने वा नहुनेबारेमा अझै यकिन भइसकेको छैन ।