पूर्ववत् अवस्थामा पोखराको पर्यटन व्यवसाय फर्कन्छ : परराष्ट्र मन्त्री साउद

गण्डकी । पोखराको पर्यटन व्यवसाय पूर्ववत् अवस्थामा फर्कने परराष्ट्रमन्त्री नारायणप्रसाद साउदले बताएका छन् । आइतबार पोखराको तोरीपानीबाट फेवाताल किनारमा प्याराग्लाइडिङ गरेपछि उनले साहसिक पर्यटनलगायतका धेरै सम्भावना बोकेको पोखराको पर्यटन व्यवसायले आगामी दिनमा गति लिने विश्वास व्यक्त गरे ।

मन्त्री साउदले पोखरा अन्तर्राष्ट्रिय विमानस्थलको उडानलाई असर नपर्ने गरी पूर्ववत् सराङकोटबाटै उडान गर्न सम्बन्धित निकायमा आफ्नोतर्फबाट पहल गर्ने उनले बताए । उनले प्याराग्लाइडिङ पोखराको महत्त्वपूर्ण पर्यटकीय गतिविधि भएको उल्लेख गरे । मन्त्री साउद सवार प्याराग्लाइडरको उडान पाइलट महेन्द्रबहादुर भट्टराईले गराएका थिए ।